സൂപ്പർ ഹിറ്റ് ടീമിന്റെ ചിത്രത്തിൽ നായകനായി ധ്യാൻ ശ്രീനിവാസൻ..!

പ്രശസ്ത നടൻ ശ്രീനിവാസന്റെ ഇളയ മകനും വിനീത് ശ്രീനിവാസന്റെ സഹോദരനുമായ ധ്യാൻ ശ്രീനിവാസനും താൻ അച്ഛനെയും ചേട്ടനെയും പോലെ ഒരു ഓൾറൗണ്ടർ ആണെന്ന് തെളിയിച്ച ആളാണ്. ഒരു നടനെന്ന നിലയിൽ പ്രശസ്തനായ ധ്യാൻ ശ്രീനിവാസൻ പിന്നീട് തിരക്കഥാ രചയിതാവായും സംവിധായകൻ ആയും കഴിവ് തെളിയിച്ച വ്യക്തിയാണ്. ഗൂഡാലോചന എന്ന ചിത്രത്തിന് ആദ്യമായി തിരക്കഥ രചിച്ച ധ്യാൻ കഴിഞ്ഞ വർഷം ലൗ ആക്ഷൻ ഡ്രാമ എന്ന ചിത്രം രചിച്ചു സംവിധാനം ചെയ്‌തും കയ്യടി നേടി. നിവിൻ പോളി നായകനായ ആ ചിത്രം ബോക്‌സ് ഓഫീസിൽ സൂപ്പർ ഹിറ്റായിരുന്നു. ഇപ്പോൾ തിരിച്ചു അഭിനേതാവായി ഒരിക്കൽ കൂടി വെള്ളിത്തിരയിൽ എത്താനൊരുങ്ങുകയാണ് ധ്യാൻ ശ്രീനിവാസൻ. അദ്ദേഹം നായകനായി എത്തുന്ന പുതിയ ചിത്രം സംവിധാനം ചെയ്യാൻ പോകുന്നത് നവാഗതനായ ജിത്തു വയലിൽ ആണ്.

സൂപ്പർ ഹിറ്റ് ചിത്രങ്ങളായ ബെസ്റ്റ് ആക്ടർ, 1983 എന്നിവ രചിച്ച ബിപിൻ ചന്ദ്രൻ രചന നിർവഹിക്കുന്ന ഈ ചിത്രത്തിൽ ഒരു ഡിറ്റക്ടീവ് ആയാണ് ധ്യാൻ ശ്രീനിവാസൻ അഭിനയിക്കുന്നതെന്നാണ് സൂചന. സത്യനേശൻ നാടാർ എന്നാണ് ഈ ചിത്രത്തിൽ ധ്യാൻ അവതരിപ്പിക്കാൻ പോകുന്ന കഥാപാത്രത്തിന്റെ പേര്. ഈ ചിത്രത്തിന് വേണ്ടി ധ്യാൻ തന്റെ ശരീര ഭാരവും ഏറെ കുറച്ചു കഴിഞ്ഞു. സൂപ്പർ ഹിറ്റ് തെലുങ്ക് ചിത്രമായ ഏജന്റ് ശ്രീനിവാസ ആത്രേയയുടെ മലയാളം റീമേക്ക് ആണ് ഈ ചിത്രമെന്ന റിപ്പോർട്ടുകളും ഇപ്പോൾ പ്രചരിക്കുന്നുണ്ട്. ഒടിയൻ, വിക്രം വേദ തുടങ്ങിയ സൂപ്പർ ഹിറ്റ് ചിത്രങ്ങൾക്ക് പശ്ചാത്തല സംഗീതമൊരുക്കിയ സാം സി എസ് സംഗീതമൊരുക്കുന്ന ഈ ചിത്രത്തിന് വേണ്ടി ക്യാമറ ചലിപ്പിക്കാൻ പോകുന്നത് അഭിനന്ദം രാമാനുജൻ ആണ്.