ടോവിനോ തോമസിന്റെ വില്ലത്തരം കാണാം ഈ ഡിസംബറിൽ; മാരി 2 എത്തുന്നു..!

യുവ താരം ടോവിനോ തോമസ് തമിഴിൽ അഭിയിക്കുന്ന രണ്ടാമത്തെ ചിത്രമാണ് ധനുഷ് നായകനായ മാരി 2 . ഇപ്പോൾ പോസ്റ്റ് പ്രൊഡക്ഷൻ സ്റ്റേജിൽ ഉള്ള ഈ ചിത്രത്തിന്റെ റിലീസ് വരുന്ന ഡിസംബർ മാസത്തിൽ ഉണ്ടാകും എന്നാണ് പുതിയ റിപ്പോർട്ടുകൾ പറയുന്നത്. മലയാളത്തിന്റെ യുവ താരമായ ടോവിനോ ഈ ചിത്രത്തിൽ വില്ലനായി ആണ് എത്തുന്നത്. ബാലാജി മോഹൻ സംവിധാനം ചെയ്ത ഈ ചിത്രം, വണ്ടര്‍ ബാര്‍ ഫിലിംസിന്റെ ബാനറില്‍ ധനുഷ് തന്നെയാണ് നിർമ്മിക്കുന്നതും. ധനുഷിന്റെ നായികയായി പ്രേമത്തിലൂടെ തെന്നിന്ത്യയിൽ പ്രശസ്തയായ സായി പല്ലവി ആണ് ഈ ചിത്രത്തിൽ അഭിനയിക്കുന്നത്. ഇപ്പോൾ ഈ ചിത്രത്തിന്റെ റിലീസ് ഡേറ്റ് ആയി അറിയാൻ സാധിക്കുന്നത് ഡിസംബർ 21 ആണ്. കേരളത്തിൽ മിനി സ്റ്റുഡിയോ ആയിരിക്കും ഈ ചിത്രം വിതരണം ചെയ്യുക. ടോവിനോ തോമസിന്റെ കൂടി സാന്നിധ്യം ഉള്ളത് കൊണ്ട് മികച്ച റിലീസ് ആയിരിക്കും ഈ ചിത്രത്തിന് കേരളത്തിൽ ലഭിക്കുക എന്നുറപ്പാണ്.

അഭിയും അനുവും എന്ന തമിഴ്- മലയാളം ദ്വിഭാഷാ ചിത്രത്തിലൂടെയാണ് ടോവിനോ തോമസ് തമിഴിൽ അരങ്ങേറിയത്. ബി ആർ വിജയലക്ഷ്മി സംവിധാനം ചെയ്ത ആ ചിത്രം പക്ഷെ ബോക്സ് ഓഫീസിൽ വലിയ ചലനങ്ങൾ സൃഷ്ടിച്ചില്ല. മാരി 2 ന്റെ റിലീസിന് മുൻപ് ടോവിനോ നായകനായ ഒരു കുപ്രസിദ്ധ പയ്യൻ എന്ന മലയാള ചിത്രവും റിലീസിന് എത്തും. മധുപാൽ ഒരുക്കിയ ഈ ചിത്രത്തിന്റെ പോസ്റ്ററുകൾ ഇപ്പോൾ സോഷ്യൽ മീഡിയയുടെ ശ്രദ്ധ നേടുകയാണ്. മറഡോണ, തീവണ്ടി എന്നീ ചിത്രങ്ങളുടെ വിജയത്തോടെ ടോവിനോ തോമസ് മലയാളത്തിലെ യുവ താര നിരയുടെ മുനിരയിലേക്കു ഉയർന്നു കഴിഞ്ഞു. മാരി 2 നു മുൻപ് ധനുഷിന് രണ്ടു റിലീസുകൾ ഉണ്ടാകും. വെട്രിമാരൻ ഒരുക്കിയ വട ചെന്നൈ ഒക്ടോബറിൽ റിലീസ് ചെയ്യുമ്പോൾ , ഗൗതം മേനോൻ ഒരുക്കിയ എന്നൈ നോക്കി പായും തോട്ട നവംബറിൽ ദീപാവലി റിലീസ് ആയി എത്തും.