കടക്കൽ ചന്ദ്രനായി മെഗാസ്റ്റാർ; വണ്ണിന്റെ കാരക്റ്റർ പോസ്റ്ററിനു ഗംഭീര സ്വീകരണം

മെഗാ സ്റ്റാർ മമ്മൂട്ടിയെ നായകനാക്കി സന്തോഷ് വിശ്വനാഥ് സംവിധാനം ചെയ്യുന്ന ചിത്രമാണ് വൺ. ബോബി- സഞ്ജയ് ടീം ആദ്യമായി മമ്മൂട്ടിക്ക് വേണ്ടി തിരക്കഥ രചിച്ച ഈ ചിത്രം 2020 ഏപ്രിൽ മാസത്തിലാണ് റിലീസ് ചെയ്യുക. ഈ ചിത്രത്തിന്റെ ടൈറ്റിൽ പോസ്റ്ററും, ലൊക്കേഷൻ സ്റ്റില്ലുകളും ഏറെ പ്രേക്ഷക ശ്രദ്ധ നേടിയെടുത്തിരുന്നു. ഇപ്പോഴിതാ ഇതിലെ ആദ്യ കാരക്റ്റെർ പോസ്റ്റർ റിലീസ് ചെയ്തിരിക്കുകയാണ്. മെഗാ സ്റ്റാർ മമ്മൂട്ടി അവതരിപ്പിക്കുന്ന കടക്കൽ ചന്ദ്രൻ എന്ന കഥാപാത്രത്തിന്റെ പോസ്റ്റർ ആണ് ഇപ്പോൾ റിലീസ് ചെയ്തിരിക്കുന്നത്. 2020 ജനുവരി ഒന്ന് വൈകുന്നേരം ആറ് മണിക്കാണ് ഈ പോസ്റ്റർ റിലീസ് ചെയ്തത്. മാസ്സ് ലുക്കിൽ ആണ് ഈ പോസ്റ്ററിൽ മമ്മൂട്ടി എത്തിയിരിക്കുന്നത്.

ഷൈലോക്ക് രണ്ടാം ടീസറും വൺ കാരക്ടർ പോസ്റ്ററും എല്ലാം ചേർന്ന് മമ്മൂട്ടി ആരാധകർക്ക് ആഘോഷം സമ്മാനിച്ച് കൊണ്ടാണ് പുതിയ വർഷം പിറന്നിരിക്കുന്നതു എന്ന് പറയാം. മമ്മൂട്ടി കേരളാ മുഖ്യമന്ത്രി ആയി അഭിനയിക്കുന്ന വണ്ണിൽ വലിയ താര നിര തന്നെ അണിനിരക്കുന്നുണ്ട്. ജോജു ജോർജ്, മുരളി ഗോപി, രഞ്ജി പണിക്കർ, വിഷ്ണു ഉണ്ണികൃഷ്ണൻ, ശ്രീനിവാസൻ, മാത്യു തോമസ്, ബാലചന്ദ്ര മേനോൻ, സുദേവ് നായർ, സുരേഷ് കൃഷ്ണ, സലിം കുമാർ, സുധീർ കരമന, ശങ്കർ രാമകൃഷ്ണൻ, അലസിയർ, ശ്യാമ പ്രസാദ്, നന്ദു , മാമുക്കോയ, മേഘനാദൻ, വി കെ ബൈജു, മുകുന്ദൻ, ജയകൃഷ്ണൻ, ജയൻ ചേർത്തല, ബാലാജി ശർമ്മ, വെട്ടുക്കിളി പ്രകാശ്, രശ്മി ബോബൻ, ഗായത്രി അരുൺ, അർച്ചന മനോജ്, പ്രമീള ദേവി, സുബ്ബ ലക്ഷ്മി എന്നിവരൊക്കെ ഈ ചിത്രത്തിന്റെ താര നിരയിൽ ഉള്ളവരാണ്.