റാമിന്റെ സംവിധാനത്തിൽ നിവിൻ പോളി; യേഴു കടൽ യേഴു മലൈ കാരക്ടർ പോസ്റ്റർ എത്തി

തരമണി, തങ്കമീന്‍കള്‍, കട്രത് തമിഴ്, അതുപോലെ മമ്മൂട്ടി നായകനായ പേരന്‍പ് എന്നീ ചിത്രവും സംവിധാനം ചെയ്ത റാം ഒരുക്കിയ പുതിയ തമിഴ് ചിത്രമാണ് യേഴു കടൽ യേഴു മലൈ. ദേശീയ അവാര്‍ഡ് ജേതാവായ ഈ സംവിധായകന്റെ ഈ പുതിയ ചിത്രത്തിൽ മലയാളത്തിന്റെ യുവ താരം നിവിൻ പോളിയാണ് നായകനായി എത്തുന്നത്. നായകൻ നിവിൻ പോളിയും സംവിധായകൻ റാമും തങ്ങളുടെ ജന്മദിനം ആഘോഷിച്ച ദിവസമാണ് ഇതിന്റെ ടൈറ്റിൽ പ്രഖ്യാപിച്ചത്. ഇപ്പോഴിതാ ഈ ചിത്രത്തിലെ നിവിൻ പോളിയുടെ കാരക്ടർ പോസ്റ്റർ റിലീസ് ചെയ്തിരിക്കുകയാണ്. അഞ്ജലി നായികാ വേഷത്തിൽ എത്തുന്ന ഈ ചിത്രത്തിൽ പ്രശസ്ത നടൻ സൂരിയും ഒരു നിർണ്ണായക വേഷം ചെയ്യുന്നുണ്ട്. സുരേഷ് കാമാച്ചിയുടെ നേതൃത്വത്തിലുള്ള വി ഹൗസ് പ്രൊഡക്ഷന്‍സ് നിർമ്മിച്ചിരിക്കുന്ന ഈ ചിത്രത്തിൽ മുടി നീട്ടി വളർത്തിയ ലുക്കിലാണ് നിവിൻ പോളി എത്തുന്നത്.

സൂപ്പർ ഹിറ്റ് സംഗീത സംവിധായകൻ യുവാൻ ശങ്കർ രാജ സംഗീതമൊരുക്കുന്ന ഈ ചിത്രത്തിന് ക്യാമറ ചലിപ്പിച്ചത് എൻ കെ ഏകാംബരം, എഡിറ്റ് ചെയ്തത് മദി വി എസ് എന്നിവരാണ്. ബോളിവുഡ് സിനിമകളില്‍ പ്രവര്‍ത്തിച്ച ചന്ദ്രക്കാന്ത് സോനവാനെ വസ്ത്രാലങ്കാരം നിർവഹിച്ചപ്പോൾ, ദേശീയ അവാർഡ് ജേതാവ് പട്ടണം റഷീദ് ആണ് ഇതിന്റെ മേക്കപ്പ് നിർവഹിച്ചത്. സ്റ്റണ്ട് സിൽവയാണ് ഇതിനു വേണ്ടി ആക്ഷൻ രംഗങ്ങൾ ഒരുക്കിയിരിക്കുന്നത്. പോസ്റ്റ് പ്രൊഡക്ഷന്‍ ജോലികള്‍ പുരോഗമിച്ചുക്കൊണ്ടിരിക്കുന്ന ഈ ചിത്രത്തിന് വേണ്ടി നൃത്ത സംവിധാനം നിർവഹിച്ചത് സാൻഡിയാണ്. ബ്ലോക്ക്ബസ്റ്ററായ വെങ്കട് പ്രഭു- സിമ്പു ചിത്രം മാനാടിനു ശേഷം സുരേഷ് കാമാച്ചിയുടെ വി ഹൗസ് പ്രൊഡക്ഷന്‍സ് നിർമ്മിച്ച ചിത്രമാണ് യേഴു കടൽ യേഴു മലൈ.