കേരളത്തിൽ റെക്കോർഡ് കളക്ഷൻ നേടി തുടക്കം ഗംഭീരമാക്കി എന്തിരൻ 2 : ത്രീഡി വിസ്മയം എന്ന് പ്രേക്ഷകർ..!

ശങ്കര്‍-രജനികാന്ത് ടീമിന്റെ ബ്രഹ്മാണ്ഡ ചിത്രം 2.0 കഴിഞ്ഞ ദിവസമാണ് ലോകം മുഴുവൻ റിലീസ് ചെയ്തത്. രജനികാന്ത് നായകനും അക്ഷയ് കുമാർ വില്ലനും ആയെത്തിയ ഈ ചിത്രം ലോകം മുഴുവനും പതിനായിരം സ്‌ക്രീനുകൾക്കു മുകളിലും കേരളത്തിൽ 458 സ്‌ക്രീനുകളിലുമാണ് എത്തിയത്. ടോമിച്ചൻ മുളകുപാടം ആണ് മുളകുപാടം ഫിലിമ്സിന്റെ ബാനറിൽ ഈ ചിത്രം കേരളത്തിൽ എത്തിച്ചത്. പതിനഞ്ചു കോടിയോളം രൂപ മുടക്കി അദ്ദേഹം വിതരണത്തിന് എടുത്ത ഈ ചിത്രം ഇവിടുത്തെ റെക്കോർഡ് റിലീസ് നേടിയതിനു ഒപ്പം തന്നെ വമ്പൻ കലക്ഷനും ആദ്യ ദിനം സ്വന്തമാക്കി. ഒഫീഷ്യൽ റിപ്പോർട്ടുകൾ പ്രകാരം ആദ്യം ഈ ചിത്രം കേരളത്തിൽ നിന്ന് നേടിയെടുത്തത് 6,09, 00 ,666 രൂപയാണ്.

തമിഴ്, തെലുങ്ക്, ഹിന്ദി ഭാഷകളില്‍ ആയി ആണ് ഈ ചിത്രം റിലീസ് ചെയ്തിരിക്കുന്നത്. ത്രീഡി വിസ്മയമായ ഈ ബ്രഹ്മാണ്ഡ ചിത്രം ഇന്ത്യയിലെ ഏറ്റവും മുതൽ മുടക്കുള്ള ചിത്രമായി നിർമ്മിച്ചത് ലൈക്ക പ്രൊഡക്ഷൻസ് ആണ്. ബാഹുബലി 2 കഴിഞ്ഞാൽ ഇന്ത്യയിൽ നിന്ന് ആദ്യ ദിനം ഏറ്റവും കൂടുതൽ കളക്ഷൻ നേടിയ ചിത്രമാണ് എന്തിരൻ 2 എന്നാണ് റിപ്പോർട്ടുകൾ പറയുന്നത്. ശങ്കര്‍, ജയമോഹന്‍ എന്നിവര്‍ ചേര്‍ന്നാണ് ഈ ചിത്രത്തിന്റെ തിരക്കഥ ഒരുക്കിയിരിക്കുന്നത്. മലയാളി താരമായ കലാഭവന്‍ ഷാജോണ്‍ ഈ ചിത്രത്തിൽ ഒരു ചെറിയ വേഷത്തിൽ അഭിനയിച്ചിട്ടുണ്ട്. എ ആർ റഹ്മാൻ സംഗീതം നൽകിയ ഈ ചിത്രത്തിന് ദൃശ്യങ്ങൾ ഒരുക്കിയത് നീരവ് ഷായും എഡിറ്റ് ചെയ്തത് ആന്റണിയും ആണ്. റസൂൽ പൂക്കുട്ടി ആണ് ഈ ചിത്രത്തിന്റെ സൗണ്ട് ഡിസൈൻ ചെയ്തിരിക്കുന്നത്. ആമി ജാക്സൺ നായികാ വേഷത്തിലെത്തിയ ഈ ചിത്രം പൂർണ്ണമായും ഐ മാക്സ് ത്രീഡിയിൽ ചിത്രീകരിച്ച ആദ്യ ഇന്ത്യൻ ചിത്രമാണ്.