മമ്മൂട്ടിയുണ്ടാകില്ല പകരം മോഹൻലാൽ ചിത്രം ഒടിയനിൽ ബോളീവുഡ് താരം മനോജ് ജോഷി എത്തും.

മലയാളത്തിന്റെ ബ്രഹ്‌മാണ്ഡ ചിത്രം, ആരാധകർ ഏറ്റവുമധികം പ്രതീക്ഷയോടെ കാത്തിരിക്കുന്ന ചിത്രം ഒടിയനിൽ നിന്നുമാണ് പുതിയ വാർത്തകൾ എത്തുന്നത്. ചിത്രത്തിന്റെ ചിത്രീകരണത്തിനായി അതിരപ്പിള്ളിയിൽ മോഹൻലാലും മഞ്ജു വാര്യരും കഴിഞ്ഞ വാരം എത്തിയിരുന്നു. ചിത്രീകരണ വേളയിൽ മമ്മൂട്ടിയും ചിത്രീകരണം നടക്കുന്ന അതിരപ്പിള്ളിയിൽ എത്തിയെന്നും ചിത്രത്തിൽ ഒരു വേഷത്തിൽ മമ്മൂട്ടി എത്തുന്നുവെന്നും അഭ്യൂഹങ്ങൾ പരന്നിരുന്നു. എന്നാൽ അതിനെയെല്ലാം കഴിഞ്ഞ ദിവസം സംവിധായകനായ വി. എ ശ്രീകുമാർ തള്ളിക്കളഞ്ഞു. ചിത്രത്തിൽ മമ്മൂട്ടി അവതരിപ്പുന്നത് ഒടിയന്റെ ഗുരുവേഷം ആണെന്നാണ് വാർത്തകൾ വന്നത്. എന്നാൽ അദ്ദേഹമല്ല കഥാപാത്രത്തെ അവതരിപ്പിക്കുന്നത് എന്നും ചിത്രത്തിൽ വളരെയേറെ പ്രാധാന്യമുള്ള കഥാപാത്രം ബോളീവുഡിൽ നിന്നുമുള്ള ഒരാളായിരിയ്ക്കും ചെയ്യുന്നതെന്നും അറിയിച്ചിരുന്നു. സൗത്ത് ഇന്ത്യൻ ചിത്രങ്ങളിൽ ഇന്നേവരെ അഭിനയിച്ചിട്ടില്ലാത്ത ആളായിരിക്കും എന്നും സംവിധായകൻ അറിയിച്ചിരുന്നു. കഴിഞ്ഞ ദിവസമാണ് കഥാപാത്രത്തെ അവതരിപ്പിക്കാൻ പ്രശസ്ത ബോളീവുഡ് താരം മനോജ് ജോഷിയാണ് എത്തുന്നത് എന്ന വിവരം പുറത്തുവിട്ടത്.

ഗുജറാത്ത് സ്വദേശിയായ മനോജ് ജോഷി കളേഴ്സ് ടി. വി യിലെ അശോക എന്ന സീരിയലിൽ ചാണക്യ എന്ന കഥാപാത്രത്തെ അവതരിപ്പിച്ചാണ് പ്രശസ്തനാകുന്നത്. പിന്നീട് നിരവധി ബോളീവുഡ് ചിത്രങ്ങളിലൂടെ അദ്ദേഹം ബോളീവുഡ് സിനിമയുടെ അമരത്തെത്തി. 2018 ൽ രാജ്യം അദ്ദേഹത്തെ പത്മ പുരസ്കാരം നൽകി ആദരിച്ചു. പ്രിയദർശൻ സിനിമകളിലെ നിത്യ സാന്നിധ്യം കൂടിയായിരുന്നു മനോജ് ജോഷി. മോഹൻലാൽ നായകനായ ഒടിയന്റെ ഷൂട്ടിങ് വാഗമണ്ണിലേക്ക് മാറുകയാണ്, മനോജ് ജോഷിയുൾപ്പെടുന്ന ചിത്രീകരണം അവിടെ വച്ചായിരിക്കുമെന്നാണ് അറിയാൻ കഴിയുന്നത്. ആശിർവാദ് സിനിമാസിനു വേണ്ടി ആന്റണി പെരുമ്പാവൂർ നിർമ്മിക്കുന്ന ചിത്രത്തിന്‍റെ ഷൂട്ടിംങ്ങ് അവസാന ഘട്ടത്തിലാണ്.