റിലീസിന് മുൻപേ ബ്ലോക്ക്ബസ്റ്റർ; ദുൽഖർ ചിത്രത്തിന്റെ റിവ്യൂ പുറത്ത്

ദുൽഖർ സൽമാൻ നായകനായ പാൻ ഇന്ത്യൻ തെലുങ്ക് ചിത്രം ലക്കി ഭാസ്കർ ഒക്‌ടോബർ 31 നാണു ദീപാവലി റിലീസായി ആഗോള തലത്തിൽ പ്രദർശനത്തിന് എത്തുന്നത്. വെങ്കി അറ്റ്ലൂരി രചിച്ച് സംവിധാനം ചെയ്ത ചിത്രം കേരളത്തിലും ഗൾഫിലും വമ്പൻ റിലീസായി വിതരണം ചെയ്യുന്നത് ദുൽഖർ സൽമാന്റെ വേഫെറർ ഫിലിംസാണ്. തെലുങ്ക്, മലയാളം, തമിഴ്, ഹിന്ദി ഭാഷകളിൽ റിലീസ് ചെയ്യുന്ന ചിത്രം സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റർടൈൻമെൻറ്സും ഫോർച്യൂൺ ഫോർ സിനിമാസും ചേർന്നാണ് നിർമ്മിച്ചിരിക്കുന്നത്. അവതരിപ്പിക്കുന്നത് ശ്രീകര സ്റ്റുഡിയോസ്.

ഇപ്പോഴിതാ റിലീസിന് മുൻപ് തന്നെ ചിത്രത്തിന് ബ്ലോക്ക്ബസ്റ്റർ റിപ്പോർട്ടുകളാണ് ലഭിക്കുന്നത്. ചിത്രത്തിന്റെ പ്രിവ്യു ഷോ നടന്നപ്പോഴുള്ള റിപ്പോർട്ടുകളാണ് ഇപ്പോൾ സോഷ്യൽ മീഡിയയിൽ പ്രചരിക്കുന്നത്. കൽക്കി 2898 എഡിയുടെ നിർമ്മാതാവായ സ്വപ്നദത്ത് ആണ് ചിത്രത്തിന്റെ ആദ്യ റിവ്യൂ പങ്ക് വെച്ചത്. ഈ ദീപാവലിക്ക് ബ്ലോക്ക്ബസ്റ്റർ ഭാസ്കർ വരുന്നു എന്ന് ഇൻസ്റ്റാഗ്രാമിൽ കുറിച്ച സ്വപ്ന, ദുൽഖർ സൽമാൻ, സംവിധായകൻ വെങ്കി അറ്റ്ലൂരി, നായികയായ മീനാക്ഷി ചൗധരി, ഛായാഗ്രഹണം, കലാസംവിധാനം, സംഗീതം എന്നവ നിർവഹിച്ച നിമിഷ് രവി, ബംഗ്ളാൻ, ജി വി പ്രകാശ് കുമാർ എന്നിവരെയും അഭിനന്ദിച്ചു.

തെലുങ്കിൽ നിന്നുള്ള ചില സിനിമാ ഓൺലൈൻ മാധ്യമ പ്രവർത്തകരും ചിത്രത്തെ കുറിച്ച് മികച്ച അഭിപ്രായം രേഖപ്പെടുത്തുന്നുണ്ട്. ഭാസ്കർ എന്ന സാധാരണക്കാരന്റെ ജീവിതത്തിൽ സംഭവിക്കുന്ന അസാധാരണമായ കഥ പറയുന്ന ഈ പീരീഡ് ഡ്രാമ ത്രില്ലറിന് ഇപ്പോൾ മികച്ച അഡ്വാൻസ് ബുക്കിംഗ് ലഭിക്കുന്നുണ്ട്. 1980 – ൯൦ കാലഘട്ടത്തിലെ ബോംബെ നഗരത്തിന്റെ പശ്ചാത്തലത്തിൽ ആണ് ചിത്രം കഥ പറയുന്നത്.