‘പടയോട്ട’ ത്തിലൂടെ ബിജുമേനോൻ വീണ്ടും നായകനാകുന്നു

വ്യത്യസ്തമായ കഥാപാത്രങ്ങളുമായി സിനിമാപ്രേമികളുടെ മനസ് കീഴടക്കിയ താരമാണ് ബിജുമേനോൻ. അസോസിയേറ്റ് ഡയറക്ടറായി പ്രവർത്തിച്ച റഫീഖ് ഇബ്രാഹിം സ്വതന്ത്ര സംവിധായകനാവുന്ന പടയോട്ടം എന്ന ചിത്രത്തിലൂടെ വീണ്ടും നായകനായി എത്തുകയാണ് ബിജുമേനോൻ. ഹാസ്യത്തിന് പ്രാധാന്യം നൽകിക്കൊണ്ടുള്ള കുടുംബചിത്രമായിരിക്കും ഇതെന്നാണ് സൂചന. ചിത്രത്തിന്റെ ഫസ്റ്റ്ലുക്ക് പോസ്റ്റർ ബിജു മേനോൻ തന്റെ ഫേസ്ബുക്ക് പേജിലൂടെ പങ്കുവെച്ചു.

റഫീഖ് ഇബ്രാഹിം തന്റെ ഫേസ്ബുക്ക് വഴിയാണ് ചിത്രത്തെക്കുറിച്ചുള്ള ഔദ്യോഗിക പ്രഖ്യാപനം നടത്തിയത്. ദീർഘനാളത്തെ ശ്രമത്തിന് ശേഷമാണ് താൻ സംവിധാന രംഗത്തേക്ക് കടന്നു വരുന്നതെന്നും ഇതിന് വേണ്ടി തന്നെ സഹായിച്ച എല്ലാവരോടും നന്ദിയും കടപ്പാടുമുണ്ടെന്നും റഫീഖ് ഇബ്രാഹിം ഫേസ്ബുക്കിൽ കുറിച്ചു. ചിത്രത്തിലെ നായികയേയും മറ്റു താരങ്ങളേയും തീരുമാനിച്ച് വരുന്നതേയുള്ളൂ. വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോൾ ആണ് ചിത്രം നിർമിക്കുന്നത്.

അഞ്ജലി മേനോൻ സംവിധാനം ചെയ്‌ത ‘ബാംഗ്ലൂർ ഡേയ്‌സ്’ , മോഹൻലാലിനെ നായകനാക്കി ജിബു ജേക്കബ് സംവിധാനം ചെയ്‌ത ‘മുന്തിരിവള്ളികൾ തളിർക്കുമ്പോൾ’ എന്നീ ചിത്രങ്ങൾക്ക് ശേഷം സോഫിയ പോൾ നിർമ്മാണരംഗത്തേക്ക് എത്തുന്ന ചിത്രമാണിത്. ജനുവരിയിൽ ചിത്രീകരണം ആരംഭിക്കുന്ന ‘പടയോട്ടം’ വിഷുവിന് തീയേറ്ററുകളിൽ എത്തുമെന്നാണ് സൂചന.