തീയേറ്ററുകളിൽ ഓണാഘോഷം തുടങ്ങുന്നു; അഡ്വാൻസ് ബുക്കിംഗ് ആരംഭിച്ച് ബേസിൽ ജോസഫിന്റെ പാൽത്തു ജാൻവർ

കുഞ്ഞി രാമായണം, ഗോദ, മിന്നൽ മുരളി തുടങ്ങിയ സൂപ്പർ ഹിറ്റ് ചിത്രങ്ങളുടെ സംവിധായകനും മലയാള സിനിമാ പ്രേമികളുടെ പ്രീയപ്പെട്ട നടന്മാരിലൊരാളുമായ ബേസിൽ ജോസഫ് നായകനായി എത്തുന്ന ഏറ്റവും പുതിയ ചിത്രമാണ് പാൽത്തു ജാൻവർ. ഓണം റിലീസായി സെപ്റ്റംബർ രണ്ടിന് പുറത്തു വരുന്ന ഈ ചിത്രം വലിയ പ്രതീക്ഷകളോടെയാണ് പ്രേക്ഷകർ കാത്തിരിക്കുന്നത്. ഇതിന്റെ രസകരമായ ടീസർ, ട്രൈലെർ, പ്രോമോ സോങ് എന്നിവയാണ് പ്രതീക്ഷകൾ വർധിക്കാനുള്ള കാരണം. ഏതായാലും ഈ വരുന്ന വെള്ളിയാഴ്ച റിലീസ് ആവാൻ പോകുന്ന ഈ സിനിമയുടെ അഡ്വാൻസ് ബുക്കിംഗ് കേരളത്തിൽ ആരംഭിച്ചു കഴിഞ്ഞു. ബുക്കിംഗ് ഓപ്പൺ ആയപ്പോൾ മുതൽ തന്നെ മികച്ച പ്രതികരണമാണ് പ്രേക്ഷകരിൽ നിന്നും ലഭിക്കുന്നത്. ഭാവന സ്റ്റുഡിയോസ്, ഫഹദ് ഫാസിൽ ആൻഡ് ഫ്രണ്ട്‌സ്, വർക്കിംഗ് ക്ലാസ് ഹീറോ എന്നീ ബാനറുകളിൽ ഫഹദ് ഫാസിൽ, ദിലീഷ് പോത്തൻ, ശ്യാം പുഷ്കരൻ എന്നിവർ ചേർന്ന് നിർമ്മിക്കുന്ന ഈ ചിത്രം സംവിധാനം ചെയ്തിരിക്കുന്നത് നവാഗതനായ സംഗീത് പി രാജനാണ്.

https://www.facebook.com/photo/?fbid=472854941519069&set=pb.100063837012344.-2207520000..

ബേസിൽ ജോസഫിനൊപ്പം ജോണി ആന്റണി, ഷമ്മി തിലകൻ, ഇന്ദ്രന്‍സ്, ദിലീഷ് പോത്തന്‍, ശ്രുതി സുരേഷ്, ജയ കുറുപ്പ്, ആതിര ഹരികുമാര്‍, തങ്കം മോഹന്‍, സ്റ്റെഫി സണ്ണി, വിജയകുമാര്‍, സിബി തോമസ്, ജോജി ജോണ്‍ എന്നിവരും, മോളിക്കുട്ടി എന്ന പശുവും വേഷമിട്ടിരിക്കുന്ന ഈ ചിത്രത്തിൽ, തെരുവക്കുന്നെന്ന പഞ്ചായത്തിൽ എത്തുന്ന പ്രസൂൺ എന്ന് പേരുള്ള ലൈവ് സ്റ്റോക്ക് ഇൻസ്പെക്ടറായാണ് ബേസിൽ ജോസഫ് അഭിനയിച്ചിരിക്കുന്നത്. ചിരിയും സന്തോഷവും ആകാംഷ നിറഞ്ഞ നിമിഷങ്ങളും സമ്മാനിക്കുന്ന ഒരു ഫീൽ ഗുഡ് ഫാമിലി കോമഡി എന്റർടൈനറായിരിക്കും ഈ ചിത്രമെന്ന സൂചനയാണ് ഇതിന്റെ ട്രൈലെർ നമ്മുക്ക് നൽകിയത്. പാൽത്തു ജാൻവറിനു വേണ്ടി സംഗീതമൊരുക്കിയത് ജസ്റ്റിൻ വർഗീസ്, എഡിറ്റ് ചെയ്തത് കിരൺ ദാസ്, ഇതിനു വേണ്ടി ക്യാമറ ചലിപ്പിച്ചത് റെനടിവെ എന്നിവരാണ്. സ്റ്റാർസ് ഹോളിഡേ ഫിലിംസാണ്‌ ഈ ചിത്രം വിദേശത്ത് വിതരണം ചെയ്യുന്നത്.