മാസ്സ് അവതാരമായി ജനപ്രിയ നായകൻ; ദിലീപ്- അരുൺ ഗോപി ചിത്രത്തിന്റെ ടൈറ്റിലും ഫസ്റ്റ് ലുക്ക് പോസ്റ്ററും എത്തി

ജനപ്രിയ നായകൻ ദിലീപിനെ നായകനാക്കി രാമലീല എന്ന വമ്പൻ ഹിറ്റ് ചിത്രമൊരുക്കിയാണ് അരുൺ ഗോപി എന്ന സംവിധായകൻ അരങ്ങേറ്റം കുറിച്ചത്. ഇപ്പോഴിതാ അദ്ദേഹം വീണ്ടും ദിലീപുമായി ഒന്നിക്കുന്ന ചിത്രം ഒരുങ്ങുകയാണ്. ഈ മാസം ഷൂട്ടിംഗ് ആരംഭിച്ച ഈ ദിലീപ് ചിത്രം അദ്ദേഹത്തിന്റെ 147 ആം ചിത്രം കൂടിയാണ്. തെന്നിന്ത്യൻ സൂപ്പർ നായികാ താരം തമന്ന മലയാളത്തിൽ ആദ്യമായി അഭിനയിക്കുന്ന ഈ ചിത്രത്തിലെ ദിലീപിന്റെ ലുക്ക് ഇന്ന് പുറത്ത് വിട്ടു. ഇന്ന് ജന്മദിനം ആഘോഷിക്കുന്ന ദിലീപിന് ആശംസകളുമായാണ് ഈ പോസ്റ്റർ റിലീസ് ചെയ്തിരിക്കുന്നത്. ബാന്ദ്ര എന്നാണ് ഈ ചിത്രത്തിന് നൽകിയിരിക്കുന്ന പേര്. ഉദയ കൃഷ്ണ തിരക്കഥ രചിക്കുന്ന ഈ ചിത്രത്തിൽ ദിലീപിനൊപ്പം വമ്പൻ താരനിരയാണ് അണിനിരക്കുന്നത്. ബോളിവുഡിൽ നിന്നുൾപ്പെടെയുള്ള താരങ്ങളാണ് ഈ ചിത്രത്തിന്റെ ഭാഗമാകുന്നത്. തമിഴ് സൂപ്പർ താരം ശരത് കുമാർ, ബോളിവുഡ് താരം ഡിനോ മോറിയ, തെലുങ്ക്- കന്നഡ താരം ഈശ്വരി റാവു, മിസ്റ്റര്‍ ഇന്ത്യ ഇന്റര്‍നാഷണലും മോഡലുമായ ദാരാസിങ്‌ ഖുറാന, തമിഴിൽ നിന്ന് വിടിവി ഗണേഷ് എന്നിവരും ഇതിന്റെ താരനിരയിലുണ്ട്.

ഷാജി കുമാർ ക്യാമറ ചലിപ്പിക്കുന്ന ഈ ചിത്രം എഡിറ്റ് ചെയ്യാൻ പോകുന്നത് വിവേക് ഹർഷനാണ്. സാം സി എസ് ആണ് ഈ ചിത്രത്തിന്റെ സംഗീത സംവിധായകൻ. അജിത്ത് വിനായക ഫിലിംസിന്‍റെ ബാനറില്‍ വിനായക അജിത്ത് ആണ് ഈ ബിഗ് ബഡ്ജറ്റ് ചിത്രം നിർമ്മിക്കുന്നത്. വോയിസ് ഓഫ് സത്യനാഥനാണ് ഇനി റിലീസ് ചെയ്യാൻ പോകുന്ന ദിലീപ് ചിത്രം. പഞ്ചാബി ഹൗസ്, പാണ്ടിപ്പട, ചൈനാടൗൺ, തെങ്കാശിപ്പട്ടണം, റിങ്ങ്മാസ്റ്റർ എന്നീ ചിത്രങ്ങൾക്കു ശേഷം റാഫി- ദിലീപ് കൂട്ടുകെട്ട് വീണ്ടും ഒന്നിക്കുന്ന ചിത്രമാണിത്. ജോജു ജോർജ്, സിദ്ദിഖ്, ജോണി ആന്റണി, വീണ നന്ദകുമാർ, അനുപം ഖേർ, പ്രകാശ് രാജ്, മകരന്ദ് ദേശ്പാണ്ഡെ,എന്നിവരും ഈ ചിത്രത്തിൽ വേഷമിട്ടിരിക്കുന്നു.