വ്യത്യസ്‌ത ഭാവങ്ങൾ നിറച്ച് ‘കാർബൺ’ ഫസ്റ്റ്ലുക്ക് പോസ്റ്റർ; ഫഹദിന്റെ ഗംഭീരപ്രകടനം പ്രതീക്ഷിച്ച് ആരാധകർ

ഫഹദ് ഫാസിലിനെ നായകനാക്കി വേണു സംവിധാനം ചെയ്യുന്ന ‘കാര്‍ബണ്‍’ എന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ ആരാധകർക്കിടയിൽ ചർച്ചയാകുന്നു. ഏറെ വ്യത്യസ്തമായ രീതിയിലായിരുന്നു കാർബണിന്റെ പോസ്റ്റർ പുറത്തിറങ്ങിയത്. ഫഹദ് തന്നെയാണ് ചിത്രത്തിന്‍റെ പോസ്റ്റര്‍ ഫേസ്ബുക്ക് പേജിലൂടെ പുറത്തുവിട്ടത്. മറ്റ് കഥാപാത്രങ്ങളുടെ മുഖത്തിന്റെ പകുതിയോടൊപ്പം ഫഹദിന്റെ വ്യത്യസ്ത ഭാവങ്ങൾ അവതരിപ്പിച്ചായിരുന്നു പോസ്റ്റർ അണിയിച്ചിരുക്കിയത്. പോസ്റ്റർ പോലെതന്നെ ചിത്രവും വ്യത്യസ്തമായിരിക്കുമെന്ന പ്രതീക്ഷയിലാണ് ആരാധകർ. ഫഹദ് എന്ന നടന്റെ മറ്റൊരു മികച്ച കഥാപാത്രമായിരിക്കും ‘കാർബണി’ലേതെന്നാണ് സൂചന.

ഒരു ഗ്രാമീണ യുവാവായാണ് ഫഹദ് എത്തുന്നത്. മംമ്ത മോഹൻദാസാണ് നായിക. മമ്മൂട്ടിയെ നായകനാക്കി ഒരുക്കിയ മുന്നറിയിപ്പിന് ശേഷം വേണു സംവിധാനം ചെയ്യുന്ന ചിത്രമാണ് ‘കാര്‍ബൺ’. വേണുവിന്റെ ഇതുവരെയുള്ള ചിത്രങ്ങളിൽ നിന്നും വ്യത്യസ്‌തമായി ഒരു കൊമേർഷ്യൽ എന്റർടെയ്‌നർ ആയിരിക്കും ‘കാർബണെ’ന്ന് നിർമ്മാതാവ് സിബി തോട്ടുപുറം മുൻപ് വ്യക്തമാക്കിയിരുന്നു.

ദിലീഷ് പോത്തൻ, നെടുമുടിവേണു, സൗബിൻ ഷാഹിർ, വിജയരാഘവൻ, മണികണ്ഠൻ ആചാരി എന്നിവർ പ്രധാന കഥാപാത്രങ്ങളായി എത്തുന്ന ചിത്രത്തിന്റെ സംഗീതം വിശാൽ ഭരദ്വാജാണ് നിർവഹിച്ചിരിക്കുന്നത്. ദേശീയ പുരസ്‌കാര ജേതാവായ വിശാല്‍ 19 വര്‍ഷത്തിന് ശേഷം മലയാളത്തിലേക്ക് എത്തുന്നു എന്ന പ്രത്യേകതയും ഈ ചിത്രത്തിനുണ്ട്. പ്രശസ്ത ഛായാഗ്രാഹകന്‍ കെ.യു മോഹനന്‍ ആണ് ചിത്രത്തിനായി ക്യാമറ ചലിപ്പിച്ചിരിക്കുന്നത്.