അസ്‌കർ അലിയുടെ രണ്ടാമത്തെ ചിത്രമായ ചെമ്പരത്തി പൂവ് ഈ മാസം എത്തുന്നു..!

യുവ താരം ആസിഫ് അലിയുടെ സഹോദരന്‍ അസ്‌കര്‍ അലിയെ നായകനാക്കി നവാഗതനായ അരുണ്‍വൈഗ തിരക്കഥ രചിച്ച് സംവിധാനം ചെയ്ത ചെമ്പരത്തി പൂവ് എന്ന ചിത്രം ഈ മാസം അവസാനത്തോടെ റിലീസ് ചെയ്യും എന്ന് റിപ്പോർട്ടുകൾ വരുന്നു. നവംബര് 24 നു ആയിരിക്കും ഈ ചിത്രം തീയേറ്ററുകളിൽ എത്തുക എന്നാണ് ഇപ്പോൾ വരുന്ന സൂചനകൾ പറയുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്റർ സിനിമ പ്രേമികളുടെ ശ്രദ്ധ പിടിച്ചു പറ്റിയിരുന്നു. അദിതി രവി നായികാ വേഷത്തിൽ എത്തുന്ന ഈ ചിത്രത്തിൽ അജു വര്‍ഗ്ഗീസും, ആനന്ദം, ചങ്ക്‌സ് എന്നീ ചിത്രങ്ങളിലൂടെ പോപ്പുലർ ആയ വിശാഖ് നായരും മറ്റു പ്രധാന കഥാപാത്രങ്ങളെ അവതരിപ്പിക്കുന്നു. അലമാര എന്ന ചിത്രത്തിലൂടെയാണ് അദിതി രവി അരങ്ങേറിയത്. പ്രണവ് മോഹൻലാൽ- ജീത്തു ജോസഫ് ചിത്രമായ ആദിയിലും അദിതി ആണ് നായിക.

ഹണി ബീ 2.5 എന്ന ചിത്രത്തിലൂടെയാണ് അസ്‌കർ അലി അരങ്ങേറിയത്. ഈ വർഷം ഓഗസ്റ്റിൽ ആണ് ലാൽ രചിച്ചു ഷൈജു അന്തിക്കാട് സംവിധാനം ചെയ്ത ഈ ചിത്രം തീയേറ്ററുകളിൽ എത്തിയത്. ലിജോ മോൾ ജോസ് ആയിരുന്നു ഈ ചിത്രത്തിൽ അസ്‌കർ അലിയുടെ നായിക. ഡ്രീംസ് സ്ക്രീൻസിന്റെ ബാനറില്‍ ഭുവനേന്ദ്രന്‍ ,സഖറിയ എന്നിവർ ചേർന്നാണ് ചെമ്പരത്തി പൂവ് എന്ന ചിത്രം നിര്‍മ്മിചിരിക്കുന്നത്. സംഗീതത്തിന് പ്രാധാന്യം നല്‍കിയിരിക്കുന്നു ഈ പ്രണയ ചിത്രത്തിൽ 7 ഗാനങ്ങളുണ്ട്. നവാഗതനായ ജിനിൽ ജോസ്, ഏങ്ങണ്ടിയൂര്‍ ചന്ദ്രശേഖരന്‍ എന്നിവരുടെ വരികൾക്ക് സംഗീതം പകർന്നിരിക്കുന്നത് എ.ആര്‍. രാകേഷും റിത്വിക്കുമാണ്. സന്തോഷ് അനിമ ആണ് ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയത്.

വിജിലേഷ്, സുധീര്‍ കരമന, ദിനേശ്‌ നായര്‍, സുനില്‍ സുഖത, കോട്ടയം പ്രദീപ്, ധര്‍മ്മജന്‍ ബോള്‍ഗാട്ടി എന്നിവരും പ്രധാന വേഷങ്ങളിൽ എത്തിയിരിക്കുന്ന ഈ ചിത്രം കേരളത്തിൽ വിതരണം ചെയ്യുന്നത് മോഹൻലാലിൻറെ മാക്സ്‌ലാബ് ആണ്.