ആസിഫ് അലിയുടെ മന്ദാരം ഡൽഹിയിൽ തുടങ്ങി..!

മലയാളത്തിലെ ഏറ്റവും തിരക്കുള്ള യുവ താരങ്ങളിൽ ഒരാളാണ് ആസിഫ് അലി. ഈ വർഷം തന്നെ ഇതിനോടകം ഏഴു ചിത്രങ്ങൾ ആസിഫ് അഭിനയിച്ചു തീയേറ്ററുകളിൽ എത്തി കഴിഞ്ഞു. ഹണി ബീ 2 , ടേക്ക് ഓഫ്, അഡ്‌വെന്റർസ് ഓഫ് ഓമനക്കുട്ടൻ, അവരുടെ രാവുകൾ, സൺ‌ഡേ ഹോളിഡേ, തൃശ്ശിവപേരൂർ ക്ലിപ്തം, ഹണി ബീ 2 . 5 എന്നിവയാണ് അവ. ഇതിൽ ടേക്ക് ഓഫ്, ഹണി ബീ 2 .5 എന്നിവയിൽ ആസിഫ് അതിഥി വേഷമാണ് ചെയ്തത്.

ആസിഫ് നായകനാകുന്ന കാറ്റ് എന്ന ചിത്രം റിലീസിന് ഒരുങ്ങുകയാണ്. അരുൺ കുമാർ അരവിന്ദ് സംവിധാനം ചെയ്ത ഈ ചിത്രത്തിന്റെ ട്രൈലെർ വൻ പ്രേക്ഷക ശ്രദ്ധ നേടിയിരുന്നു. ഇപ്പോൾ ലഭിക്കുന്ന വിവരങ്ങൾ പ്രകാരം ആസിഫ് അലി നായകനാകുന്ന അടുത്ത ചിത്രമായ മന്ദാരത്തിന്റെ ചിത്രീകരണം ഡൽഹിയിൽ ആരംഭിച്ചു .

നവാഗതനായ വിജേഷ് വിജയ് സംവിധാനം ചെയ്യുന്ന ഈ ചിത്രം ഒരു കഥാപാത്രത്തിന്റെ 25 വർഷത്തെ ജീവിതത്തിന്റെ കഥയാണ് പറയുന്നത്. ഈ ചിത്രത്തിൽ അഞ്ചു വ്യത്യസ്ത ഗെറ്റപ്പിൽ ആസിഫിനെ കാണാൻ കഴിയും. ഡൽഹി, ലേ, ലഡാക്ക് എന്നിവിടങ്ങളിൽ ആയാണ് ഈ ചിത്രത്തിന്റെ മർമ പ്രധാനമായ ഭാഗങ്ങൾ ചിത്രീകരിക്കുക.

എം സജാസ് തിരക്കഥ ഒരുക്കിയിരിക്കുന്ന ഈ ചിത്രം ഒരുപ്രണയ കഥയാണ് പറയുന്നത്. പ്രണയം ഒരാളുടെ ജീവിതത്തെ എങ്ങനെ മാറ്റി മറിക്കുന്നു എന്നും ഒരാളുടെ ജീവിതത്തിൽ അവന്റെ മാതാപിതാക്കളും കൂട്ടുകാരുമെല്ലാം ഏതൊക്കെ രീതിയിൽ സ്വാധീനം ചെലുത്തും എന്നുമെല്ലാണ് ഈ ചിത്രം പറയുന്നത്. ഒരു പുതുമുഖമായിരിക്കും ഈ ചിത്രത്തിലെ നായിക.