വിജയ് സൂപ്പർ ആയി; ഇനി വക്കീൽ വേഷം സൂപ്പറാക്കാൻ ആസിഫ് അലി..!

ആസിഫ് അലി നായകനായി എത്തിയ ജിസ് ജോയ് ചിത്രമായ വിജയ് സൂപ്പറും പൗർണ്ണമിയും ബോക്സ് ഓഫീസിൽ വിജയം നേടി മുന്നേറുകയാണ്. അപ്പോഴാണ് ആസിഫ് അലിയുടെ അടുത്ത റിലീസ് ആയ കക്ഷി അമ്മിണി പിള്ളയുടെ ഫസ്റ്റ് ലുക്ക് പോസ്റ്റർ റിലീസ് ചെയ്തത്. ആസിഫ് അലി വക്കീൽ വേഷത്തിൽ പ്രത്യക്ഷപ്പെടുന്ന ഈ ചിത്രത്തിന്റെ  ഫസ്റ്റ് ലുക്ക് പോസ്റ്റർ ഇപ്പോൾ ഏറെ ശ്രദ്ധ നേടിയെടുക്കുകയാണ്. ഒരു പ്രത്യേക തരം ഭാവ പ്രകടനത്തോടെ നിൽക്കുന്ന ആസിഫ് അലിയുടെ ഫസ്റ്റ് ലുക്ക് പ്രേക്ഷകർ ഇരു കയ്യും നീട്ടി സ്വീകരിച്ചു കഴിഞ്ഞു. നവാഗതനായ ദിന്‍ജിത്ത് അയ്യത്താന്‍ സംവിധാനം ചെയ്ത ഈ ചിത്രം രചിച്ചിരിക്കുന്നത് സനിലേഷ് ശിവൻ ആണ്. സാറ ഫിലിംസിന്റെ ബാനറില്‍ റിജു രാജൻ ആണ് ഈ ചിത്രം നിർമ്മിച്ചിരിക്കുന്നത്.

പ്രദീപൻ മാഞ്ചോടി എന്ന കഥാപാത്രം ആയി ആസിഫ് അലി അഭിനയിക്കുന്ന ഈ ചിത്രത്തിലെ നായികാ വേഷം ചെയ്തിരിക്കുന്നത് സ്വാതന്ത്ര്യം അര്‍ദ്ധരാത്രിയില്‍ എന്ന ചിത്രത്തിലൂടെ ശ്രദ്ധേയയായ അശ്വതി മനോഹരനാണ്. അഹമ്മദ് സിദ്ദിഖി, ബേസിൽ ജോസഫ്, വിജയരാഘവൻ, നിർമൽ പാലാഴി, സുധീഷ്, ശ്രീകാന്ത് മുരളി, ലുക്മാൻ, ഹരീഷ് കണാരൻ, ബാബു സ്വാമി, മാമൂക്കോയ, ഉണ്ണിരാജ, സുധി പറവൂർ, ശിവദാസൻ, ഷിബില, സരസ ബാലുശേരി എന്നിവരും ഈ ചിത്രത്തിന്റെ താര നിരയിൽ ഉണ്ട്. ബിജിപാലും അരുൺ മുരളീധരനും ചേർന്ന് സംഗീത സംവിധാനം നിർവഹിച്ചിരിക്കുന്ന ഈ ചിത്രത്തിന് പശ്ചാത്തല സംഗീതം ഒരുക്കിയിരിക്കുന്നത് ജേക്സ് ബിജോയ് ആണ്. ബാഹുല് രമേശ് കാമറ ചലിപ്പിച്ചിരിക്കുന്ന കക്ഷി അമ്മിണി പിള്ള എഡിറ്റ് ചെയ്തിരിക്കുന്നത് സൂരജ് ഇ എസ് ആണ്.