ലാലേട്ടന്റെ മുഖത്തു ആഞ്ഞടിച്ച ആ രംഗം; ദൃശ്യം 2 ഷൂട്ടിംഗ് അനുഭവം പങ്ക് വെച്ചു ആശ ശരത്..!

കംപ്ലീറ്റ് ആക്ടർ മോഹൻലാൽ നായകനായ ദൃശ്യം 2 എന്ന ചിത്രം കഴിഞ്ഞ രണ്ടു ദിവസമായി ഇന്ത്യ മുഴുവൻ തരംഗമായി നിൽക്കുകയാണ്. മലയാളത്തിന്റെ അതിർത്തി ഭേദിച്ചു തമിഴ്, തെലുങ്ക്, കന്നഡ ജനതയും ഉത്തരേന്ത്യൻ സിനിമാ പ്രേക്ഷകർ വരേയും ഇപ്പോൾ സംസാരിക്കുന്നത് ദൃശ്യം 2 എന്നയീ ചിത്രത്തെ കുറിച്ചാണ്. ആമസോണ് പ്രൈം റീലീസ് ആയെത്തിയ ഈ ചിത്രം രചിച്ചു സംവിധാനം ചെയ്തത് ആദ്യ ഭാഗം ഒരുക്കിയ ജീത്തു ജോസഫ് തന്നെയാണ്. ആദ്യ ഭാഗത്തിൽ അഭിനയിച്ച ഒട്ടുമിക്ക കലാകാരന്മാരും ഈ രണ്ടാം ഭാഗത്തിലും അഭിനയിച്ചിട്ടുണ്ട്. അതിൽ പ്രമുഖയാണ് ഗീത പ്രഭാകർ എന്ന കഥാപാത്രമായി എത്തിയ ആശ ശരത്. ദൃശ്യം എന്ന ചിത്രവും ഈ കഥാപാത്രവുമാണ് ആശയുടെ കരിയറിലെ വഴിത്തിരിവായി മാറിയത്.

അതേ കഥാപാത്രമായി ദൃശ്യം 2 ഇൽ പ്രത്യക്ഷപെട്ടപ്പോൾ ഉണ്ടായ അനുഭവം വെളിപ്പെടുത്തുകയാണ് ആശയിപ്പോൾ. ഈ ചിത്രത്തിന്റെ ഷൂട്ടിംഗ് സമയത്തു തന്നെ ഏറ്റവും കൂടുതൽ ടെൻഷനടിപ്പിച്ചത് താൻ ലാലേട്ടന്റെ മുഖത്ത് അടിക്കുന്ന രംഗമായിരുന്നു എന്നാണ് ആശ പറയുന്നത്. വളരെ നിർണ്ണായകമായ രംഗം ആണതെന്നും, ലാലേട്ടനും ജീത്തു ജോസഫും നൽകിയ ധൈര്യവും പിന്തുണയുമാണ് ആ രംഗം ചെയ്യാൻ തന്നെ സഹായിച്ചതെന്നും ആശ ശരത് പറയുന്നു. അവരുടെ സഹായത്തോടെ ആ രംഗം ചെയ്തത് വരെ രസകരമായ ഒരനുഭവം കൂടിയാണെന്നും ആശ വിശദീകരിക്കുന്നു. ഇത് ഒരു കഥാപാത്രം മാത്രമാണെന്ന് പറഞ്ഞു ലാലേട്ടനാണ് തന്നെ കൂളാക്കി നിർത്തിയതെന്നും അവർ പറഞ്ഞു. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ഈ ചിത്രത്തിൽ മുരളി ഗോപി, സിദ്ദിഖ്, അഞ്ജലി, ഗണേഷ് കുമാർ, എസ്തർ, അൻസിബ, അജിത് കൂത്താട്ടുകുളം, ജോയ് മാത്യു, ആദം അയൂബ്, നാരായണൻ നായർ, ശാന്തി പ്രിയ, കൃഷ്ണ, ദിനേശ് പ്രഭാകർ എന്നിവരും അഭിനയിച്ചിരിക്കുന്നു.

ഫോട്ടോ കടപ്പാട്: ഇൻസ്റ്റാഗ്രാം