ന്യൂ ജനറേഷൻ ആയാലും ഓൾഡ് ജനറേഷൻ ആയാലും ബോസ് ഹീറോ ആടാ; ഷൈലോക്കിനെ പ്രശംസിച്ചു അനു സിതാര

മെഗാ സ്റ്റാർ മമ്മൂട്ടി നായകനായ ഷൈലോക്ക് എന്ന ചിത്രം ഇന്ന് കേരളത്തിൽ റിലീസ് ചെയ്തു. അജയ് വാസുദേവ് സംവിധാനം ചെയ്ത ഈ ചിത്രം മമ്മൂട്ടി ആരാധകർക്കു ആവേശം സമ്മാനിക്കുന്ന ഒരു ചിത്രമാണ്. ബോസ് എന്നു പേരുള്ള ഒരു പലിശക്കാരനായി മമ്മൂട്ടിയെത്തുന്ന ഈ ചിത്രത്തിനെ പ്രശംസിച്ചു ഇപ്പോഴെത്തിയിരിക്കുന്നത് അനു സിത്താരയാണ്. കടുത്ത മമ്മൂട്ടി ആരാധിക കൂടിയായ ഈ നടി ചിത്രത്തിലെ ഒരു ഡയലോഗ് കടമെടുത്തുകൊണ്ടു തന്നെയാണ് ഈ ചിത്രത്തെ പ്രശംസിച്ചിരിക്കുന്നത്. ന്യൂ ജനറേഷൻ ആയാലും ഓൾഡ് ജനറേഷൻ ആയാലും ബോസ് ഹീറോ ആടാ എന്ന ഈ ചിത്രത്തിലെ മമ്മൂട്ടിയുടെ ഡയലോഗിനൊപ്പം ചിത്രം മെഗാ മാസ്സ് ആണെന്നും ഈ നടി തന്നെ ഫേസ്ബുക്ക് പോസ്റ്റിൽ കുറിച്ചു.

നവാഗതരായ ബിബിൻ മോഹൻ, അനീഷ് ഹമീദ് എന്നിവർ ചേർന്നാണ് ഈ ചിത്രം രചിച്ചിരിക്കുന്നത്. ഗുഡ് വിൽ എന്റർടൈൻമെൻറ്സിന്റെ ബാനറിൽ ജോബി ജോർജ് നിർമ്മാണം നിർവഹിച്ചിരിക്കുന്ന ഈ മാസ്സ് ചിത്രത്തിൽ വമ്പൻ താര നിരയാണ് അണിനിരന്നിരിക്കുന്നത്‌. മമ്മൂട്ടിക്കൊപ്പം തമിഴ് നടൻ രാജ് കിരൺ, മീന, സിദ്ദിഖ്, ബിബിൻ ജോർജ്, കലാഭവൻ ഷാജോൺ, ബൈജു സന്തോഷ്, ഹരീഷ് കണാരൻ എന്നിവരും ഈ ചിത്രത്തിൽ മികച്ച പ്രകടനം കാഴ്ച വെച്ചവരാണ്. റെനഡിവേ ഒരുക്കിയ ദൃശ്യങ്ങളും ഗോപി സുന്ദർ ഒരുക്കിയ സംഗീതവും അതോടൊപ്പം റിയാസ് കെ ബാദർ നിർവഹിച്ച എഡിറ്റിംഗും ഈ ചിത്രത്തിന് മുതൽകൂട്ടായിട്ടുണ്ട്. രാജാധിരാജ, മാസ്റ്റർപീസ് എന്നിവക്ക് ശേഷം അജയ് വാസുദേവ് ഒരുക്കിയ ചിത്രമാണ് ഷൈലോക്ക്. മികച്ച പ്രതികരണം ലഭിക്കുന്ന ഈ ചിത്രം മികച്ച വിജയം നേടുമെന്നാണ് ആരാധകരുടെ പ്രതീക്ഷ.