മാമാങ്കത്തിലെ ആ സീൻ ചെയ്യാൻ കുറച്ചു പ്രയാസമായിരുന്നു; മനസ്സ് തുറന്നു അനു സിതാര

മെഗാ സ്റ്റാർ മമ്മൂട്ടി നായകനായ മാമാങ്കം എന്ന ചിത്രം ഇപ്പോൾ പ്രദർശനം തുടരുകയാണ്. മമ്മൂട്ടി, ഉണ്ണി മുകുന്ദൻ, മാസ്റ്റർ അച്യുതൻ, പ്രാചി ടെഹ്‌ലൻ എന്നിവർക്കൊപ്പം ഈ ചിത്രത്തിലെ ഒരു നിർണ്ണായക വേഷം ചെയ്ത താരമാണ് അനു സിതാര. എം പദ്മകുമാർ സംവിധാനം ചെയ്ത ഈ ചിത്രത്തിൽ ഉണ്ണി മുകുന്ദൻ അവതരിപ്പിക്കുന്ന ചന്ദ്രോത് പണിക്കർ എന്ന കഥാപാത്രത്തിന്റെ ഭാര്യ വേഷത്തിൽ ആണ് അനു സിതാര എത്തിയത്. ഇപ്പോഴിതാ ഈ ചിത്രത്തിലെ ഇമോഷണലായ ഒരു രംഗം അവതരിപ്പിക്കാന്‍ താന്‍ അല്‍പ്പം പ്രയാസപ്പെട്ടു എന്ന വെളിപ്പെടുത്തലുമായി രംഗത്ത് വന്നിരിക്കുകയാണ് ഈ നടി. തനിക്കു വളരെ കുറച്ചു സീനുകൾ ആണ് ഈ ചിത്രത്തിൽ ഉള്ളു എങ്കിലും അത് വൈകാരിക രംഗങ്ങൾ ആയിരുന്നത് കാരണം ചെയ്യാൻ കുറച്ചു പ്രയാസപ്പെട്ടു എന്നാണ് അനു സിതാര പറയുന്നത്.

പഴയകാലത്ത് ചാവേറായി പോകുന്ന ആളുടെ ഭാര്യമാരുടെ അവസ്ഥ എന്തായിരിക്കുമെന്നതാണ് തന്റെ കഥാപാത്രത്തിലൂടെ കാണിക്കുന്നത് എന്നും ചാവേറായി ഭര്‍ത്താക്കന്മാര്‍ പോകുമ്പോള്‍ ഭാര്യമാര്‍ കരയാതെ ഉള്ളിലെ വിഷമം പുറമേ കാട്ടാതെ പിടിച്ച് നില്‍ക്കണം എന്നും അനു സിതാര പറയുന്നു. എന്നാൽ താൻ പെട്ടെന്ന് വിഷമം വരുന്ന ഒരാൾ ആണെന്നും അങ്ങനെയുള്ള തനിക്കു ആ രംഗം അവതരിപ്പിക്കാൻ വലിയ പ്രയാസം തോന്നി എന്നും ഈ നടി പറയുന്നു. കൗമുദിയുമായുള്ള അഭിമുഖത്തിൽ ആണ് അനു സിതാര ഈ കാര്യം വെളിപ്പെടുത്തിയത്. കാവ്യാ ഫിലിമ്സിന്റെ ബാനറിൽ വേണു കുന്നപ്പിള്ളി സംവിധാനം ചെയ്ത ഈ ചിത്രം നാലു ഭാഷകളിൽ ആയാണ് റിലീസ് ചെയ്തത്.