പക്കിക്കും കൊച്ചുണ്ണിക്കും ശേഷം ബോക്സ് ഓഫീസ് റെക്കോർഡുകൾ കൊള്ളയടിക്കാൻ മറ്റൊരു കള്ളൻ; ആനക്കള്ളൻ റിലീസിന് ഒരുങ്ങുന്നു..!

കായംകുളം കൊച്ചുണ്ണിയും ഇത്തിക്കര പക്കിയും ബോക്സ് ഓഫീസ് റെക്കോർഡുകൾ തൂഫാനാക്കുന്ന കാഴ്ചയാണ് ഇപ്പോൾ നമ്മൾ കണ്ടു കൊണ്ടിരിക്കുന്നത്. ഈ നിവിൻ പോളി- മോഹൻലാൽ- റോഷൻ ആൻഡ്രൂസ് ചിത്രം കേരളാ ബോക്സ് ഓഫീസിൽ പ്രകമ്പനം മുഴക്കി മുന്നേറുന്നതിനിടയിൽ മറ്റൊരു കള്ളൻ കൂടി ബോക്സ് ഓഫീസ് കൊള്ളയ്ക്കായി ഈ ആഴ്ച മുതൽ കേരളത്തിൽ എത്തുന്നു. ബിജു മേനോൻ നായകനായ ആനക്കള്ളൻ ആണ് ഈ വരുന്ന വ്യാഴാഴ്ച റിലീസ് ചെയ്യാൻ പോകുന്ന മലയാള ചിത്രങ്ങളിൽ ഒന്ന്. മൂന്നു വർഷം മുൻപ് റിലീസ് ചെയ്ത ഇവൻ മര്യാദ രാമൻ എന്ന ദിലീപ് ചിത്രം ഒരുക്കി കൊണ്ട് സംവിധായകനായി അരങ്ങേറിയ സുരേഷ് ദിവാകർ ആണ് ആനക്കള്ളൻ സംവിധാനം ചെയ്തിരിക്കുന്നത് .

പ്രശസ്ത തിരക്കഥാകൃത് ഉദയ കൃഷ്ണ തിരക്കഥ ഒരുക്കിയ ഈ ചിത്രത്തിന്റെ നിർമ്മാണം നിർവഹിച്ചിരിക്കുന്നതു പഞ്ചവര്‍ണതത്തയുടെ സൂപ്പർ വിജയത്തിന് ശേഷം സപ്ത തരംഗ് സിനിമയാണ്. ആനക്കള്ളന്റെ ട്രൈലെർ മികച്ച പ്രേക്ഷക പ്രതികരണം ആണ് നേടിയെടുത്തത്. ഒരു കമ്പ്ലീറ്റ് കോമഡി എന്റെർറ്റൈനെർ ആയി ഒരുക്കിയിരിക്കുന്ന ഈ ചിത്രത്തിൽ വലിയ താര നിര തന്നെ അണിനിരന്നിട്ടുണ്ട്. ആൽബി ദൃശ്യങ്ങൾ ഒരുക്കിയ ഈ ചിത്രത്തിന് സംഗീതം പകർന്നത് നാദിർഷായും ഈ ചിത്രം എഡിറ്റ് ചെയ്തിരിക്കുന്നത് ജോണ്കുട്ടിയും ആണ്. അനുശ്രീ, ഷംന കാസിം എന്നിവര്‍ നായികമാരായി എത്തുന്ന ഈ ചിത്രത്തിൽ പ്രിയങ്ക, ബിന്ദു പണിക്കര്‍, സിദ്ധിഖ്, ഹരീഷ് കണാരന്‍, ധര്‍മജന്‍, സുരാജ് വെഞ്ഞാറമൂട്, സുധീര്‍ കരമന, കൈലാഷ്, ജനാർദ്ദനൻ, സായികുമാര്‍, സുരേഷ് കൃഷ്ണ, ഇന്ദ്രന്‍സ് തുടങ്ങിയവർ അഭിനയിക്കുന്നുണ്ട്. പടയോട്ടത്തിന്റെ വിജയത്തിന് ശേഷം ബിജു മേനോൻ നായകനായി എത്തുന്ന ചിത്രമാണ് ആനക്കള്ളൻ.