നിഗൂഢമായ ഒരു യാത്ര; ശ്രദ്ധ നേടി നിഗൂഡം കാരക്ടർ പോസ്റ്ററുകൾ.

പ്രശസ്ത നടൻ അനൂപ് മേനോൻ നായകനായി എത്തുന്ന ഏറ്റവും പുതിയ ചിത്രമാണ് നിഗൂഡം. അനൂപ് മേനോനോടൊപ്പം ഇന്ദ്രൻസും പ്രധാന വേഷം ചെയ്യുന്ന ഈ ചിത്രത്തിന്റെ ചിത്രീകരണം ഇപ്പോൾ തിരുവനന്തപുരത്താണ് നടന്നു കൊണ്ടിരിക്കുന്നത്. നവാഗതരായ അജേഷ് ആന്റണി, അനീഷ് ബി ജെ, ബെപ്സൺ നോർബെൽ എന്നിവർ ചേർന്നാണ് ഈ ചിത്രത്തിന്റെ രചനയും സംവിധാനവും നിർവഹിക്കുന്നത്. എ ടെയ്ൽ ഓഫ് മിസ്റ്റീരിയസ് ജേർണി എന്നാണ് ഈ ചിത്രത്തിന്റെ ടൈറ്റിൽ ടാഗ് ലൈൻ. നിഗൂഢമായ ഒരു യാത്രയുടെ കഥ പറയുന്ന ഈ ചിത്രം, ഒരു പ്രത്യേക ലക്ഷ്യത്തോടെ, പ്രശസ്ത ചിത്രകാരനായ ശങ്കർ എന്ന കഥാപാത്രം നടത്തുന്ന ഒരു യാത്രയാണ് നമ്മുടെ മുന്നിലെത്തിക്കാൻ പോകുന്നത്. ആ യാത്രയിലൂടെ ഈ കഥാപാത്രം കണ്ടെത്തുന്ന ചില നിഗൂഢമായ കാര്യങ്ങളാണ് ഈ ചിത്രത്തിലൂടെ പ്രേക്ഷകരുടെ മുന്നിലെത്തുക. ഇപ്പോഴിതാ ഈ ചിത്രത്തിൽ നിർണ്ണായക കഥാപാത്രങ്ങളായി എത്തുന്നവരുടെ കാരക്ടർ പോസ്റ്ററുകൾ റിലീസ് ചെയ്തിരിക്കുകയാണ് അണിയറ പ്രവർത്തകർ.

ഇന്ദ്രൻസ്, അനൂപ് മേനോൻ, സെന്തിൽ കൃഷ്ണ എന്നിവരുടെ വ്യത്യസ്തമായ ക്യാരക്ടർ പോസ്റ്ററുകളാണ് ഇപ്പോൾ പുറത്തു വന്നിരിക്കുന്നത്. ജി & ജി പ്രൊഡക്ഷൻസിന്‍റെ ബാനറിൽ അജേഷ് എസ്.കെ. നിർമ്മിക്കുന്ന ചിത്രത്തില്‍ മുകളിൽ പറഞ്ഞവരെ കൂടാതെ, റോസിൻ ജോളി, ഗൗതമി നായർ, ശിവകാമി എന്നിവരാണ് മറ്റ് പ്രധാന വേഷങ്ങൾ ചെയ്യുന്നത്. പ്രദീപ് നായർ കാമറ ചലിപ്പിച്ച ഈ ചിത്രത്തിന് സംഗീതമൊരുക്കുന്നത് റോണി റാഫേൽ ആണ്. സുബിൻ സോമൻ ആണ് ഈ ചിത്രത്തിന്റെ എഡിറ്റിംഗ് നിർവഹിക്കുക. ഏതായാലും ഇപ്പോൾ റിലീസ് ചെയ്തിരിക്കുന്ന ഈ കാരക്ടർ പോസ്റ്ററുകൾ മികച്ച ശ്രദ്ധയാണ് നേടുന്നത്.