വീട്ടു ജോലിക്കാരന്റെ ശവമഞ്ചമേന്തി അമിതാഭ് ബച്ചനും അഭിഷേക് ബച്ചനും; ഹൃദയം നിറഞ്ഞ ആദരവ് എന്ന് സോഷ്യല്‍ മീഡിയ

ബോളിവുഡ് ഇതിഹാസം അമിതാബ് ബച്ചനും അഭിഷേക് ബച്ചനും ആണ് ഇന്ന് സോഷ്യൽ മീഡിയയുടെ കയ്യടി നേടിയെടുത്ത രണ്ടു പേര്. തങ്ങളുടെ വീട്ടിൽ ജോലി ചെയ്തിരുന്ന ആൾ മരണപ്പെട്ടപ്പോൾ ഇരുവരും ആദ്യാവസാനം സംസ്ക്കാര ചടങ്ങിൽ പങ്കെടുത്തു എന്ന് മാത്രമല്ല, മരണപ്പെട്ട വീട്ടുജോലിക്കാരന്റെ ശവമഞ്ചവും ചുമന്നു നീങ്ങിയത് ബിഗ് ബിയും മകൻ അഭിഷേക് ബച്ചനും ആണ്. ഇരുവരുടെയും ഈ പ്രവൃത്തിക്കു ഹൃദയം നിറഞ്ഞ കയ്യടിയും ബഹുമാനവും ആണ് സോഷ്യൽ മീഡിയ ഇപ്പോൾ നൽകുന്നത്. തങ്ങളുടെ ജോലിക്കാരന്റെ അവസാന യാത്രയിലും അദ്ദേഹം അർഹിച്ച ബഹുമാനം നൽകിയ ബച്ചൻ കുടുംബം ഒരു മികച്ച സന്ദേശവും സംസ്ക്കാരവും തന്നെയാണ് നമ്മുക്ക് കാണിച്ചു തന്നത് എന്ന് സോഷ്യൽ മീഡിയ പറയുന്നു.

ഇരുവരും ശവമഞ്ചം വഹിച്ചു കൊണ്ട് നീങ്ങുന്ന ചിത്രം ഇപ്പോൾ സോഷ്യൽ മീഡിയയിൽ വൈറൽ ആണ്. നാൽപ്പതു വയസ്സുള്ള ആ വീട്ടു ജോലിക്കാരന്റെ  മരണാനന്തര ചടങ്ങുകളിൽ പങ്കെടുക്കുന്ന ബച്ചൻ കുടുംബത്തിന്റെ ചിത്രങ്ങൾ ഒരു ആരാധകൻ ആണ് സോഷ്യൽ മീഡിയ വഴി പങ്കു വെച്ചത്. തങ്ങൾക്കു വേണ്ടി ഇത്രയും കാലം വിശ്വസ്തതയോടെ ജോലി ചെയ്ത ആൾക്ക് നൽകുന്ന ആദരവും ബഹുമാനവും ആണ് ബച്ചൻ കുടുംബം കാഴ്ച വെച്ചത്. ആ മര്യാദ കാണിച്ച സീനിയർ ബച്ചനും ജൂനിയർ  ബച്ചനും എല്ലാവരുടെയും മനസ്സിൽ ഇടം പിടിച്ചു കഴിഞ്ഞു. ” ഇത് ഈ കുടുംബത്തിന്റെ മാതൃകയാണ്. തങ്ങള്‍ക്ക് വേണ്ടി ജോലി ചെയ്യുന്നവര്‍ക്ക് ആദരവും ബഹുമാനവും നല്‍കുകയെന്നത്. അതുകൊണ്ടാണ് പതിറ്റാണ്ടുകളായി വിശ്വസ്തതയോടെ പ്രവര്‍ത്തിക്കുന്ന ജോലിക്കാര്‍ ഈ കുടുംബത്തിനുള്ളത്. എന്തൊക്കെയാണെങ്കിലും ഈ ലോകത്ത് ചില കാര്യങ്ങളെങ്കിലും ശരിയാണ്”  എന്നതാണ് ഈ ചിത്രം പങ്കു വെച്ച് കൊണ്ട് ആരാധകർ പറയുന്ന വാക്കുകൾ.