സിനിമ റിലീസ് ആവണ ദിവസം നമുക്ക് നോക്കാം; സംശയം പ്രകടിപ്പിച്ചവന് കിടിലൻ മറുപടിയുമായി അൽഫോൻസ് പുത്രൻ..!

7 വര്‍ഷത്തിന് ശേഷം അല്‍ഫോണ്‍സ് പുത്രന്‍ സംവിധാനം ചെയ്ത ഗോള്‍ഡ് എന്ന ചിത്രം റിലീസിന് ഒരുങ്ങുകയാണ്. പൃഥ്വിരാജ് സുകുമാരൻ, ലേഡി സൂപ്പർ സ്റ്റാർ നയൻ താര എന്നിവർ പ്രധാന വേഷങ്ങൾ ചെയ്യുന്ന ഈ ചിത്രത്തിന്റെ ടീസർ രണ്ടു ദിവസം മുൻപാണ് റിലീസ് ചെയ്തത്. വലിയ സ്വീകരണമാണ് ഈ ടീസറിന് പ്രേക്ഷകരിൽ നിന്നും ലഭിച്ചത്. 24 മണിക്കൂറിനുള്ളില്‍ ഏറ്റവുമധികം കാഴ്ചക്കാരെ ലഭിക്കുന്ന ടീസര്‍ എന്ന റെക്കോര്‍ഡും ഗോള്‍ഡ് ടീസർ സ്വന്തമാക്കി. ഭീഷ്മ പർവ്വം എന്ന ചിത്രത്തിന്റെ ടീസർ റെക്കോർഡ് ആണ് ഗോൾഡ് ടീസർ തകർത്തത്. ഈ വിവരം അറിയിച്ചുകൊണ്ട് അല്‍ഫോണ്‍സ് തന്നെ ഫേസ്ബുക്കില്‍ പോസ്റ്റ് പങ്കുവെച്ചിരുന്നു. അതിൽ അദ്ദേഹം കുറിച്ചത്, “കേരള ചരിത്രത്തില്‍ ഇരുപത്തിനാലു മണിക്കൂറിനുള്ളില്‍ എറ്റവും കൂടുതല്‍ വ്യൂസ് ഉള്ള ടീസര്‍ ‘ ഗോള്‍ഡ് ‘. എല്ലാവര്‍ക്കും നന്ദി” എന്നാണ്.

എന്നാൽ ഈ പോസ്റ്റിനു താഴെ ഒരാൾ കമന്റുമായി എത്തിയത് ഇങ്ങനെ, “ചേട്ടാ, ഇത് പെയ്ഡ്/ ബോട്ട് വ്യൂസ് ആണെന്ന് ആണ് എല്ലാവരും പറയുന്നത്.. സത്യമാണോ?..”. ഇതിനു മറുപടിയായി അൽഫോൻസ് പുത്രൻ കമന്റു ചെയ്തത്, “സിനിമ റിലീസ് ആവണ ദിവസം നമുക്ക് നോക്കാം ബോട്ട്/പെയ്ഡ് വ്യൂസ് ആണോ എന്ന് ബ്രോ. തിയേറ്ററില്‍ സത്യം അറിയാലോ. ഞാനും റിലീസിനായി കാത്തിരിക്കുകയാണ്” എന്നാണ്. ഏതായാലും അൽഫോൻസ് പുത്രന്റെ ഈ മറുപടി സോഷ്യൽ മീഡിയയിൽ ഇപ്പോൾ വൈറൽ ആണ്. സംവിധായകന്റെ ആത്മവിശ്വാസം ആണ് ഈ മറുപടിയുടെ കാണാൻ സാധിക്കുന്നത് എന്നാണ് ഇപ്പോൾ ആരാധകർ പറയുന്നത്. അൽഫോൻസ് പുത്രൻ തന്നെ രചിച്ച ഈ ചിത്രത്തിൽ മല്ലിക സുകുമാരൻ, അജ്മൽ അമീർ, തെസ്നി ഖാൻ, ബാബുരാജ്, ജഗദീഷ്, കൃഷ്ണ ശങ്കർ, ശബരീഷ് വർമ്മ, ഷമ്മി തിലകൻ, ശാന്തി കൃഷ്ണ, ചെമ്പൻ വിനോദ്, ലാലു അലക്സ്, പ്രേം കുമാർ, സൈജു കുറുപ്പ് എന്നിവരും അഭിനയിക്കുന്നുണ്ട്. ഈ ചിത്രം നിർമ്മിക്കുന്നത് പൃഥ്വിരാജ് സുകുമാരനും മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫനും ചേർന്നാണ്.