സംവിധായകൻ ആറ്റ്ലി ചിത്രം വേണ്ടെന്നു വച്ച് അല്ലു അർജുൻ; കാരണം ഇത്…

ഇന്ന് തമിഴ് സിനിമയിലെ സൂപ്പർ ഹിറ്റ് സംവിധായകരിലൊരാളാണ് ആറ്റ്‌ലി. രാജ റാണി, തെറി, മേർസൽ, ബിഗിൽ എന്നീ സൂപ്പർഹിറ്റുകൾ ഒരുക്കിയ ആറ്റ്‌ലി , ഇപ്പോൾ ബോളിവുഡ് ചിത്രമാണ് സംവിധാനം ചെയ്യുന്നത്. ബോളിവുഡ് കിങ് ഖാൻ ഷാരൂഖ് ഖാൻ നായകനായെത്തുന്ന ഈ ചിത്രത്തിൽ ലേഡി സൂപ്പർ സ്റ്റാർ നയൻതാരയാണ് നായികാ വേഷം ചെയ്യുന്നത്. ഇതോടു കൂടി ആറ്റ്‌ലിയുടെ താരമൂല്യം വലിയ രീതിയിലാണ് ഉയർന്നിരിക്കുന്നത്. ഏറ്റവും പുതിയതായി വന്ന റിപ്പോർട്ടുകൾ പ്രകാരം, ആറ്റ്‌ലി അടുത്തിടെ തെലുങ്ക് സൂപ്പർ താരം അല്ലു അർജുനുമായി ഒരു പ്രോജക്റ്റിനായി ചർച്ചകൾ നടത്തിയിരുന്നു. ഒരു ബിഗ് ബഡ്ജറ്റ് പാൻ-ഇന്ത്യ ചിത്രത്തിൽ ആറ്റ്‌ലിയ്‌ക്കൊപ്പം ജോലി ചെയ്യാൻ അല്ലു പദ്ധതിയിടുന്നതായി റിപ്പോർട്ടുകൾ വന്നിരുന്നു. എന്നാൽ വലിയ ഒരു ട്വിസ്റ്റാണ് ഈ പ്രോജക്ടിന്റെ കാര്യത്തിൽ സംഭവിച്ചിരിക്കുന്നതെന്നു മാധ്യമങ്ങൾ പറയുന്നു.

പുതിയ റിപ്പോർട്ടുകൾ പറയുന്നത്, ആറ്റ്ലിയെന്ന സംവിധായകന്റെ ഭീമമായ പ്രതിഫലം അല്ലു അർജുനെ ഞെട്ടിച്ചെന്നും, അത്കൊണ്ട് തന്നെ ആ പ്രോജക്റ്റിൽ നിന്ന് അല്ലു അർജുൻ പിന്മാറിയെന്നുമാണ്. 35 കോടി രൂപയാണ് ആറ്റ്‌ലി പ്രതിഫലമായി ആവശ്യപ്പെട്ടതെന്നും വാർത്തകൾ വരുന്നുണ്ട്. എന്നാൽ ഈ കാര്യത്തിൽ ഇതുവരെ ഔദ്യോഗിക സ്ഥിതീകരണം ലഭിച്ചിട്ടില്ല. ആറ്റ്ലി- അല്ലു അർജുൻ ചിത്രത്തിന്റെ നിർമ്മാണം നിർവഹിക്കാനിരുന്നത് ലൈക്ക പ്രൊഡക്ഷൻസ് ആണെന്നാണ് സൂചന. 2.0, കൈതി, ദർബാർ എന്നിവയുൾപ്പെടെ നിരവധി തമിഴ് ബ്രഹ്മാണ്ഡ ചിത്രങ്ങൾ നിർമ്മിച്ചവരാണ് ലൈക്ക പ്രൊഡക്ഷൻസ്. പുഷ്പക്കു ശേഷം അല്ലു അർജുൻ ഇനി ചെയ്യാൻ പോകുന്നത് പുഷ്പ 2 ആണ്. അതുപോലെ 100 കോടി രൂപയോളം പ്രതിഫലമാണിപ്പോൾ അല്ലു അര്ജുന് ഓഫർ ചെയ്യുന്നതെന്നും വാർത്തകൾ വരുന്നുണ്ട്.