എനിക്ക് വേണ്ടി അക്ഷയ് കുമാർ സാർ കാത്തിരുന്നത് ഒരു മണിക്കൂറോളം; 2.0 അനുഭവം പങ്കുവെച്ച് കലാഭവൻ ഷാജോൺ..!

ഇന്ത്യൻ സിനിമയിലെ ഏറ്റവും വലിയ ചിത്രമായ 2.0 നാളെ റിലീസ് ചെയ്യുകയാണ്. സൂപ്പർ സ്റ്റാർ രജനികാന്തും ബോളിവുഡ് സൂപ്പർ താരം അക്ഷയ് കുമാറും ഒന്നിച്ച ഈ ചിത്രം സംവിധാനം ചെയ്തത് ശങ്കർ ആണ്. ഈ ത്രീഡി വിസ്മയ ചിത്രത്തിൽ മലയാളത്തിന്റെ പ്രീയപ്പെട്ട നടൻ ആയ കലാഭവൻ ഷാജോണും അഭിനയിച്ചിട്ടുണ്ട്. എന്തിരൻ 2 ജീവിതത്തിലെ മറക്കാനാവാത്ത അനുഭവം ആണെന്നും അതോടൊപ്പം അക്ഷയ് കുമാറിനൊപ്പം ഒരുമിച്ചു അഭിനയിക്കാൻ പറ്റിയതിനെ കുറിച്ചും ഷാജോൺ ആവേശത്തോടെ വെളിപ്പെടുത്തുന്നു. ചെറുപ്പം മുതലേ അക്ഷയ് കുമാറിനെ കടുത്ത ആരാധകൻ ആണ് താൻ എന്നും അതുകൊണ്ടു തന്നെ അദ്ദേഹത്തോടൊപ്പം ഒരു സെൽഫി എടുക്കണം എന്ന് വലിയ ആഗ്രഹമായിരുന്നു എന്നും ഷാജോൺ പറയുന്നു.

കോമ്പിനേഷൻ സീനുകൾ ഉണ്ടായിരുന്നു എങ്കിലും അക്ഷയ് കുമാറിന്റെ മേക് അപ്പ് വളരെ ഹെവി ആയിരുന്നതിനാൽ ഷൂട്ട് നടക്കുമ്പോൾ അദ്ദേഹത്തിന് ഒരുപാട് സംസാരിക്കാൻ ആവുമായിരുന്നില്ല. അങ്ങനെ ഷൂട്ടിന്റെ അവസാന ദിവസം അദ്ദേഹവുമൊത്തു ഒരു സെൽഫി എടുക്കണം എന്ന ആഗ്രഹം ചിത്രത്തിന്റെ ഒരു അസ്സോസിയേറ്റിനോട് ഷാജോൺ അറിയിച്ചു. എന്നാൽ ഷാജോണിന്റെ സീനുകൾ തീരുന്നതിനു മുൻപ് തന്നെ അക്ഷയ് കുമാറിന്റെ ഭാഗങ്ങൾ തീരുകയും അദ്ദേഹം മേക് അപ്പ് അഴിക്കാനായി പോവുകയും ചെയ്തു. ഷൂട്ടിനിടയിൽ പോയി സെൽഫി എടുക്കുന്നത് ശരിയല്ലാത്തതു കൊണ്ട് തന്റെ സെൽഫി മോഹം മറന്നു കളഞ്ഞേക്കാം എന്ന് വിചാരിച്ചു ഷാജോൺ നിൽക്കുമ്പോൾ ആണ് മൂന്ന് മണിക്കൂറോളം കഴിഞ്ഞു അസ്സോസിയേറ്റ് വന്നു പറയുന്നത്, കഴിഞ്ഞ ഒരു മണിക്കൂറായി ഷാജോണിനെ കാത്തു അക്ഷയ് കുമാർ കാരവാനിൽ ഇരിക്കുകയാണ് എന്ന്. തനിക്കു വിശ്വസിക്കാൻ പറ്റുന്നതിലും അപ്പുറമായിരുന്നു അത് എന്നും അതിനു ശേഷം അദ്ദേഹത്തെ പോയി കണ്ടു സെൽഫി എടുക്കുകയും ഒരുപാട് നേരം സംസാരിക്കുകയും ചെയ്തു എന്നും ഷാജോൺ പറയുന്നു.