അജിതും ശിവയും ഒന്നിക്കുന്ന ‘വിശ്വാസം’ ചിത്രീകരണം ഉടൻ ആരംഭിക്കുന്നു

അജിതും ശിവയും ഒന്നിക്കുന്ന ‘വിശ്വാസ’ത്തിന്റെ ഷൂട്ടിംഗ് ജനുവരി 18ന് തുടങ്ങും. വീരം, വേതാളം, വിവേകം, എന്നീ ചിത്രങ്ങള്‍ക്ക് ശേഷം ഇരുവരും ഒന്നിക്കുന്ന നാലാമത്തെ ചിത്രമാണ് വിശ്വാസം. പ്രീപ്രൊഡക്ഷൻ ജോലികൾ പൂർത്തിയായതായി സംവിധായകൻ അറിയിച്ചു. വിവേകത്തിന്റെ നിര്‍മാതാക്കളായ സത്യ ജ്യോതി ഫിലിംസാണ് ചിത്രം നിര്‍മിക്കുന്നത്. അടുത്ത ദീപാവലിക്ക് റിലീസ് ചെയ്യാനാണ് തീരുമാനം. അജിത്തിന്റെ അൻപത്തി എട്ടാമത് ചിത്രമാണിത്. യുവൻ ശങ്കർ രാജയാണ് സംഗീതം നിർവഹിക്കുന്നത്.

ഗൗതം മേനോന്‍ സംവിധാനം ചെയ്ത എന്നൈ അറിന്താള്‍ എന്ന ചിത്രത്തിന് ശേഷം അനുഷ്‌ക ഷെട്ടി വീണ്ടും അജിതിന്റെ നായികയായി എത്തുന്നുവെന്നതാണ് ചിത്രത്തിന്റെ മറ്റൊരു പ്രത്യേകത. ഗ്രാമീണ പശ്ചാത്തലത്തിൽ ഒരുക്കിയ ‘വീരം’ എന്ന ചിത്രത്തിലൂടെയാണ് അജിത്-ശിവ കൂട്ടുകെട്ട് ആരംഭിച്ചത്. വേതാളം എന്ന ചിത്രവും ഈ കൂട്ടുകെട്ടില്‍ ഇറങ്ങി. രണ്ട് ചിത്രങ്ങളും ബോക്‌സ് ഓഫീസിൽ വിജയം നേടിയെങ്കിലും പിന്നീട് പുറത്തിറങ്ങിയ വിവേകത്തിന് സമ്മിശ്ര പ്രതികരണമായിരുന്നു ലഭിച്ചത്.

വീരം, വേതാളം തുടങ്ങിയ ഹിറ്റ് ചിത്രങ്ങളുടെ സമാന മാതൃക പിന്തുടരുന്ന രീതിയിലാകും പുതിയ ചിത്രമെന്നാണ് റിപ്പോർട്ട്. കൂടാതെ പുതിയ ഗെറ്റപ്പിൽ അജിത് പ്രത്യക്ഷപ്പെടുന്നുവെന്നും സൂചനകളുണ്ട്. ശിവയും അജിത്തും ഒന്നിച്ച ചിത്രങ്ങളൊക്കെ മികച്ചതായതിനാല്‍ അടുത്ത സിനിമയ്ക്കായി കാത്തിരിക്കുകയാണ് ആരാധകരും.