ടൊവിനോയുടെ കരിയറിലെ നാഴികക്കല്ലാവാൻ അജയന്റെ രണ്ടാം മോഷണം നാളെ മുതൽ

യുവതാരം ടോവിനോ തോമസിന്റെ കരിയറിലെ നാഴികക്കല്ലായി മാറാൻ ഒരുങ്ങുകയാണ് നാളെ പ്രേക്ഷകരുടെ മുന്നിലെത്തുന്ന ബ്രഹ്മാണ്ഡ മലയാള ചിത്രമായ അജയന്റെ രണ്ടാം മോഷണം. നവാഗതനായ ജിതിൻ ലാൽ ഒരുക്കിയ ഈ ചിത്രം ടോവിനോയുടെ കരിയറിലെ തന്നെ ഏറ്റവും വലിയ ചിത്രവുമാണ്, ഏറ്റവും വലിയ റിലീസുമാണ്. മലയാളം കൂടാതെ തമിഴ്, തെലുങ്ക്, ഹിന്ദി, കന്നഡ ഭാഷകളിലായി പാൻ ഇന്ത്യൻ തലത്തിൽ റിലീസ് ചെയ്യുന്ന ഈ ചിത്രം ത്രീഡി ഫോർമാറ്റിലും പ്രേക്ഷകരുടെ മുന്നിലെത്തും.

ഈ ഫാന്റസി പീരീഡ് ആക്ഷൻ ഡ്രാമ വൻ വിജയം നേടിയാൽ, ഒരു പാൻ ഇന്ത്യൻ താരം എന്ന നിലയിൽ ശ്രദ്ധ നേടാൻ ടോവിനോ തോമസിന് സാധിക്കും. ഈ ചിത്രത്തിൽ മൂന്ന് കഥാപാത്രങ്ങൾക്കാണ് അദ്ദേഹം ജീവൻ പകർന്നിരിക്കുന്നത്. അത് കൊണ്ട് തന്നെ ഒരു നടനെന്ന നിലയിലും ഈ സിനിമ ടോവിനോ തോമസിന് നിർണ്ണായകമായി മാറുന്നുണ്ട്. വ്യത്യസ്ത കഥാപാത്രങ്ങളായി തന്റെ പ്രകടനം കൊണ്ട് പ്രേക്ഷകരെ ഞെട്ടിക്കാൻ സാധിച്ചാൽ, മലയാള സിനിമയുടെ പുതുതലമുറയിലെ ഏറ്റവും മികച്ച നടന്മാരുടെ നിരയിലേക്ക് ടോവിനോ തോമസിന് ഉയരാം.

വടക്കൻ പാട്ടിന്റെ ശൈലി കൂടി ഉപയോഗിച്ച ഈ ചിത്രത്തിന് വേണ്ടി ടോവിനോ തോമസ് കളരി അഭ്യസിച്ചിരുന്നു. അജയൻ, മണിയൻ, കുഞ്ഞിക്കേളു എന്നീ മൂന്നു കഥാപാത്രങ്ങൾക്ക് വേണ്ടി ശരീര ഭാരം വരെ വ്യത്യാസപ്പെടുത്തിയ ടോവിനോ, മൂന്നു ശരീര ഭാഷയാണ് ഈ കഥാപാത്രങ്ങൾക്ക് നല്കിയിരിക്കുന്നതെന്നും, പ്രകടനം കൊണ്ട് തനിക്ക് പകരക്കാരനില്ലാത്ത നിലയിലാണ് അദ്ദേഹം ഈ കഥാപാത്രങ്ങൾ ചെയ്ത് വെച്ചിരിക്കുന്നതെന്നും സാക്ഷ്യപ്പെടുത്തുന്നത് ഈ ചിത്രത്തിന്റെ രചയിതാവായ സുജിത് നമ്പ്യാരാണ്.

ആക്ഷനും പ്രണയവും ഫാന്റസിയും ഡ്രാമയും എല്ലാം ഉൾപ്പെട്ട അജയന്റെ രണ്ടാം മോഷണം ഒരു വലിയ വിജയം നേടുമെന്ന് തന്നെയാണ് പ്രേക്ഷകരും അണിയറ പ്രവർത്തകരും ഒരുപോലെ വിശ്വസിക്കുന്നത്. മാജിക് ഫ്രെയിംസ്, യു.ജി.എം മോഷൻ പിക്ചേഴ്സ് എന്നീ ബാനറുകളിൽ ലിസ്റ്റിൻ സ്റ്റീഫൻ, ഡോ. സക്കറിയ തോമസ് എന്നിവർ ചേർന്നാണ് ഈ ബിഗ് ബഡ്ജറ്റ് ചിത്രം നിർമ്മിച്ചത്