ആദ്യം മെഗാ സ്റ്റാറിന് ഒപ്പം ചേച്ചി, ഇപ്പോൾ അനിയത്തി..!

മെഗാ സ്റ്റാർ മമ്മൂട്ടി നായകനായി എത്തുന്ന പുതിയ ചിത്രമാണ് വൺ. അദ്ദേഹം കേരളാ മുഖ്യമന്ത്രി ആയി എത്തുന്ന ഈ ചിത്രം സംവിധാനം ചെയ്യുന്നത് ചിറകൊടിഞ്ഞ കിനാവുകൾ എന്ന കുഞ്ചാക്കോ ബോബൻ ചിത്രം നമ്മുക്ക് സമ്മാനിച്ച് കൊണ്ട് മലയാള സിനിമയിൽ അരങ്ങേറ്റം കുറിച്ച സന്തോഷ് വിശ്വനാഥ് ആണ്. പ്രശസ്ത രചയിതാക്കളായ ബോബി- സഞ്ജയ് ടീം ആദ്യമായി മമ്മൂട്ടിക്ക് വേണ്ടി തിരക്കഥ ഒരുക്കുന്ന ഈ പൊളിറ്റിക്കൽ ഡ്രാമയുടെ ചിത്രീകരണം കുറച്ചു ദിവസങ്ങൾക്കു മുൻപാണ് ആരംഭിച്ചത്. കടക്കൽ ചന്ദ്രൻ എന്നാണ് മമ്മൂട്ടി ഈ ചിത്രത്തിൽ അവതരിപ്പിക്കുന്ന രാഷ്ട്രീയക്കാരനായ കഥാപാത്രത്തിന്റെ പേര്. വൺ എന്ന ഈ ചിത്രത്തിലൂടെ പ്രശസ്ത നടി അഹാന കൃഷ്ണയുടെ അനുജത്തി ആയ ഇഷാനി കൃഷ്നയും അഭിനയ രംഗത്ത് എത്തുകയാണ്.

നടൻ കൃഷ്ണ കുമാറിന്റെ പെൺമക്കളിൽ മൂത്തവളായ അഹാന കൃഷ്ണ നിവിൻ പോളിയുടെ ഞണ്ടുകളുടെ നാട്ടിൽ ഒരിടവേള, ടോവിനോ തോമസിന്റെ ലൂക്ക എന്നീ ചിത്രങ്ങളിലൂടെ മലയാള സിനിമാ പ്രേമികളുടെ ഇടയിൽ പ്രശസ്തയാണ്. ശങ്കർ രാമകൃഷ്ണൻ ഒരുക്കിയ പതിനെട്ടാം പടി എന്ന ചിത്രത്തിൽ മമ്മൂട്ടിയുടെ ഒപ്പവും അഹാന അഭിനയിച്ചിരുന്നു. ഇപ്പോഴിതാ അഹാനയുടെ അനുജത്തി ഇഷാനി എത്തുന്നതും ഒരു മമ്മൂട്ടി ചിത്രത്തിലൂടെ ആണ്. ഇഷാനി മമ്മൂട്ടിക്ക് ഒപ്പം നിൽക്കുന്ന പുതിയ ലൊക്കേഷൻ സ്റ്റിലും ശ്രദ്ധ നേടുന്നുണ്ട്.

ഈ ചിത്രത്തിൽ മമ്മൂട്ടിക്ക് ഒപ്പം മുരളി ഗോപി, ജോജു ജോർജ്, രഞ്ജി പണിക്കർ, വിഷ്ണു ഉണ്ണികൃഷ്ണൻ, ശ്രീനിവാസൻ, മാത്യു തോമസ്, ബാലചന്ദ്ര മേനോൻ, സുദേവ് നായർ, സുരേഷ് കൃഷ്ണ, സലിം കുമാർ, സുധീർ കരമന, ശങ്കർ രാമകൃഷ്ണൻ, അലസിയർ, ശ്യാമ പ്രസാദ്, നന്ദു, മാമുക്കോയ, മേഘനാദൻ, വി കെ ബൈജു, മുകുന്ദൻ, ജയകൃഷ്ണൻ, ജയൻ ചേർത്തല, ബാലാജി ശർമ്മ, വെട്ടുക്കിളി പ്രകാശ്, രശ്മി ബോബൻ, ഗായത്രി അരുൺ, അർച്ചന മനോജ്, പ്രമീള ദേവി, സുബ്ബ ലക്ഷ്മി എന്നിവരും അഭിനയിക്കുന്നുണ്ട്. ഇച്ചായീസ് പ്രൊഡക്ഷൻസ് നിർമ്മിക്കുന്ന ഈ ചിത്രം അടുത്ത വർഷം ഏപ്രിൽ അല്ലെങ്കിൽ ജൂൺ മാസത്തിൽ റിലീസ് ചെയ്യും എന്നാണ് ഇപ്പോൾ ലഭിക്കുന്ന റിപ്പോർട്ടുകൾ പറയുന്നത്.