പുലി മുരുകനും മോൺസ്റ്ററിനും ശേഷം വീണ്ടും ഒരു മോഹൻലാൽ ചിത്രം; വൈശാഖ് വെളിപ്പെടുത്തുന്നു..!

മോഹൻലാൽ- വൈശാഖ് ടീം ആദ്യമായി ഒന്നിച്ച ചിത്രമായിരുന്നു പുലി മുരുകൻ. ഉദയ കൃഷ്ണ രചിച്ചു ടോമിച്ചൻ മുളകുപാടം നിർമ്മിച്ച ഈ ചിത്രം മലയാള സിനിമയുടെ ചരിത്രത്തിൽ തന്നെ ഇടം പിടിച്ചു. മലയാള സിനിമയിലെ ആദ്യത്തെ നൂറു കോടി കളക്ഷൻ നേടുന്ന ചിത്രമായി മാറിയ പുലി മുരുകൻ വേട്ട അവസാനിപ്പിച്ചത് 143 കോടിയുടെ അത്ഭുതകരമായ ആഗോള ഗ്രോസ് നേടിയാണ്. ഇപ്പോഴും മലയാളത്തിലെ ഇൻഡസ്ട്രി ഹിറ്റായി നിലകൊള്ളുകയാണ് ഈ ചിത്രം. അതിനു ശേഷം മോഹൻലാൽ- വൈശാഖ്- ഉദയ കൃഷ്ണ കൂട്ടുകെട്ട് വീണ്ടും ഒന്നിച്ച ചിത്രമാണ് മോൺസ്റ്റർ. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ഈ ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ ഇപ്പോൾ പുരോഗമിക്കുകയാണ്. ഒരു ത്രില്ലർ ആയാണ് ഈ ചിത്രം ഒരുക്കിയിരിക്കുന്നത് എന്നാണ് വൈശാഖ് പറയുന്നത്.

അതിനോടൊപ്പം തന്നെ ഇനി ഒരു മോഹൻലാൽ ചിത്രം കൂടി തങ്ങൾ പ്ലാൻ ചെയ്തു കൊണ്ടിരിക്കുകയാണ് എന്നാണ് വൈശാഖ് വെളിപ്പെടുത്തുന്നത്. മോണ്‍സ്റ്ററിന് പുറമേ ലാലേട്ടന് വേണ്ടി പുതിയ ഒരു സിനിമ എഴുതിക്കൊണ്ടിരിക്കുകയാണ് എന്നും താനും ഉദയ്കൃഷ്ണയും അതിന് പിന്നിലുള്ള ജോലികളിലാണ് എന്നും വൈശാഖ് പറയുന്നു. അത് പൂര്‍ത്തിയായ ശേഷമേ ലാലേട്ടനോട് കഥ പറയുകയുള്ളൂ എന്നും വൈശാഖ് കൂട്ടിച്ചേർത്തു. മോൺസ്റ്റർ റിലീസ് ആയ ശേഷം വൈശാഖ് ചെയ്യാൻ പോകുന്നത് ന്യൂയോർക് എന്ന മമ്മൂട്ടി ചിത്രമാണ്. അതിനു ശേഷം ആയിരിക്കും പുതിയ മോഹൻലാൽ ചിത്രം ആരംഭിക്കുക. വൈശാഖിന്റെ ഏറ്റവും പുതിയ ചിത്രമായ നൈറ്റ് ഡ്രൈവ് ഈ കഴിഞ്ഞ വെള്ളിയാഴ്ചയാണ് റിലീസ് ചെയ്തത്. ഇന്ദ്രജിത്, റോഷൻ മാത്യു, അന്ന ബെൻ എന്നിവർ വേഷമിട്ട ഈ ത്രില്ലർ മികച്ച അഭിപ്രായങ്ങൾ നേടി മുന്നേറുകയാണ്.