മോഹൻലാലിനു പിന്നാലെ കോണ്ടസയ്ക്ക് ആശംസകളുമായി ലിംഗുസാമിയും

അങ്കമാലി ഡയറീസ് എന്ന തന്റെ ആദ്യ ചിത്രത്തിലൂടെ തന്നെ പ്രശസ്തനായി മാറിയ അപ്പാനി ശരത്തിന് ആശംസകളുമായി തമിഴിലെ സൂപ്പർ താര സംവിധായകൻ ലിംഗുസാമി. ലിജോ ജോസ് പെല്ലിശ്ശേരി സംവിധാനം ചെയ്ത ആന്റണി വർഗീസ് നായകനായി എത്തിയ ചിത്രം മികച്ച നിരൂപണ പ്രശംസയ്ക്കൊപ്പം വാണിജ്യ വിജയവും കരസ്ഥമാക്കിയിരുന്നു. ചിത്രത്തിലെ അപ്പാനി രവി എന്ന വില്ലൻ വേഷം നായകനോളം തന്നെ ശ്രദ്ധിക്കപ്പെട്ടിരുന്നു. അപ്പാനി രവി ആയി എത്തിയ ശരത് അതിലൂടെ മലയാളികൾ സുപരിചിതനായി മാറുകയും ചെയ്തു. അങ്കമാലിക്ക് ശേഷം ലാൽജോസ് ചിത്രം വെളിപാടിനെ പുസ്തകം, സണ്ണി വെയിൻ നായകനായി എത്തിയ പോക്കിരി സൈമൺ തുടങ്ങിയവയിലും അപ്പാനി ശരത് തിളങ്ങി. അപ്പാനി ശരത് നായക വേഷത്തിൽ എത്തുന്ന പുതിയ ചിത്രം കോണ്ടസയ്ക്ക് അഭിനന്ദനങ്ങൾ അറിയിച്ചു കൊണ്ടാണ് പയ്യ, സണ്ടകോഴി, വേട്ടൈ, അഞ്ചാൻ തുടങ്ങി സൂപ്പർ താര ചിത്രങ്ങളുടെ സംവിധായകൻ ലിംഗുസാമി രംഗത്തെത്തിയത്.

തന്റെ ഫേസ്ബുക്ക് അക്കൗണ്ട് വഴിയാണ് ലിംഗുസാമി അപ്പാനി ശരത്തിനും കോണ്ടസ ടീമിനും ആശംസകൾ അറിയിച്ചത്. തമിഴ് സംവിധായകൻ ആണെങ്കിൽ കൂടിയും മലയാളം ചിത്രങ്ങൾ കൂടുതൽ ശ്രദ്ധിക്കുന്നതും വിലയിരുത്തുന്നതുമായ സംവിധായകൻ ആണ് ലിംഗുസാമി. ലിംഗുസാമി സംവിധാനം ചെയ്ത ആദ്യ ചിത്രം ആനന്ദത്തിലെ നായകൻ മമ്മൂട്ടി ആയിരുന്നു. ചിത്രം വളരെ മികച്ച നിരൂപണ പ്രശംസ കൈവരിക്കുകയും ചെയ്തിരുന്നു. അപ്പാനി ശരത്തിനും കൊണ്ടസയ്ക്കും ആശംസകളായി ആയി മുൻപ് എത്തിയിരുന്നത് മോഹൻലാൽ ആയിരുന്നു. ഒടിയന്റെ ഷൂട്ടിംഗ് ലൊക്കേഷനിൽ വെച്ചായിരുന്നു മോഹൻലാലിന്റെ അനുഗ്രഹത്തിനായി അപ്പാനി ശരത് അദ്ദേഹത്തെ കാണാൻ എത്തിയത്. നവാഗതനായ സുദീപ് സംവിധാനം ചെയ്യുന്ന ചിത്രത്തിന്റെ പ്രാരംഭഘട്ട നടപടികൾ പുരോഗമിക്കുകയാണ്.