ലാലേട്ടന് ശേഷം ഇനി മമ്മുക്കക്കും ദിലീപിനുമൊപ്പം; വെളിപ്പെടുത്തി ആറാട്ട് രചയിതാവ്..!

ഇപ്പോൾ സൂപ്പർ വിജയം നേടി തീയ്യേറ്ററിൽ കളിക്കുന്ന മലയാള ചിത്രമാണ് മോഹൻലാൽ നായകനായ നെയ്യാറ്റിൻകര ഗോപന്റെ ആറാട്ട്. ബി ഉണ്ണികൃഷ്ണൻ നിർമ്മിച്ച്, സംവിധാനം ചെയ്ത ഈ ചിത്രം രചിച്ചിരിക്കുന്നത് ഉദയകൃഷ്ണ ആണ്. ഒരു പക്കാ മോഹൻലാൽ ഷോ ആയി ഒരുക്കിയ ഈ ചിത്രം മാസ്സ് ചിത്രങ്ങളെ ഇഷ്ട്ടപെടുന്ന പ്രേക്ഷകരും മോഹൻലാൽ ആരാധകരും ഇരു കയ്യും നീട്ടിയാണ് സ്വീകരിച്ചിരിക്കുന്നത്. ഇപ്പോഴിതാ ഈ ചിത്രം രചിച്ച ഉദയ കൃഷ്ണ തന്റെ പുതിയ ചിത്രങ്ങളെ കുറിച്ച് സംസാരിക്കുകയാണ്. ബി ഉണ്ണികൃഷ്ണൻ തന്നെ സംവിധാനം ചെയ്യാൻ പോകുന്ന മമ്മുക്ക ചിത്രമാണ് അടുത്തത് എന്നും അതിന്റെ തിരക്കഥ പൂർത്തിയാക്കി എന്നും ഉദയ കൃഷ്ണ പറയുന്നു. അതിനു ശേഷം അരുൺ ഗോപി സംവിധാനം ചെയ്യാൻ പോകുന്ന ദിലീപ് ചിത്രമാണ് ഒരുക്കുക എന്നും ഉദയ കൃഷ്ണ വ്യക്തമാക്കി.

ഇത് കൂടാതെ വൈശാഖ് ഒരുക്കുന്ന മോഹൻലാൽ ചിത്രത്തിന്റെ തിരക്കഥയും ഉദയ കൃഷ്ണ ആണ്. മോൺസ്റ്റർ എന്ന ഈ ചിത്രത്തിന്റെ ഷൂട്ടിംഗ് പൂർത്തിയായി, ഇപ്പോൾ അതിന്റെ പോസ്റ്റ് പ്രൊഡക്ഷൻ സ്റ്റേജിലാണ്. മമ്മൂട്ടി- ബി ഉണ്ണികൃഷ്ണൻ ചിത്രം മാസ്സ് ആയിരിക്കുമെങ്കിലും അല്പം ഗൗരവ സ്വഭാവമുള്ള ഒരു ത്രില്ലർ ടൈപ്പ് ചിത്രം ആയിരിക്കുമെന്ന് ഉണ്ണികൃഷ്ണൻ തന്നെ വെളിപ്പെടുത്തിയിരുന്നു. ഏതായാലും ഇന്ന് മലയാളത്തിലെ ഏറ്റവും വിലപിടിപ്പുള്ള തിരക്കഥാകൃത്തായ ഉദയ കൃഷ്ണ ഒട്ടേറെ പ്രൊജെക്ടുകളുമായി തിരക്കിലാണ്. മേല്പറഞ്ഞവ കൂടാതെ മറ്റൊരു മോഹൻലാൽ- ബി ഉണ്ണികൃഷ്ണൻ ചിത്രം കൂടി ഉദയ കൃഷ്ണ തിരക്കഥ പൂർത്തിയാക്കി വെച്ചിട്ടുണ്ട്. കോവിഡ് കാലഘട്ടത്തിൽ ഷൂട്ട് ചെയ്യാൻ പറ്റാത്തത് കൊണ്ട് അത് മാറ്റി വെച്ചാണ് അവർ ആറാട്ടിൽ എത്തിയത്.