33 വർഷങ്ങൾക്ക് ശേഷം മോഹൻലാലും ഫാസിലും വീണ്ടും ഒന്നിക്കുന്നു….

മലയാളികൾക്ക് എന്നും ഓർത്തിരിക്കാവുന്ന ഒരുപാട് ചിത്രങ്ങൾ സമ്മാനിച്ച വ്യക്തിയാണ് ഫാസിൽ. മലയാളത്തിലെ എക്കാലത്തെയും വലിയ ഹിറ്റ് ചിത്രമാണ് ‘മണിച്ചിത്രത്താഴ്’. ഫാസിൽ എന്ന സംവിധായകന്റെ കരിയറിലെ പൊൻതൂവൽ എന്ന് വിശേഷിപ്പിക്കാവുന്ന ചിത്രം കൂടിയായിരുന്നത്. കുറെ വർഷങ്ങൾക്ക് ശേഷം സംവിധാന രംഗത്തിൽ നിന്ന് പിന്മാരുകയായിരുന്നു അദ്ദേഹം, ഇന്നും ഫാസിൽ ചിത്രത്തിന് വേണ്ടി കാത്തിരിക്കുന്ന സിനിമ പ്രേമികളുമുണ്ട്. സിനിമ പ്രേമികൾക്ക് ഏറെ സന്തോഷം നൽകുന്ന കാര്യമാണ് ഇപ്പോൾ പുറത്ത് വന്നിരിക്കുന്നത്. സംവിധായകൻ ഫാസിൽ വലിയൊരു തിരിച്ചു വരവ് നടത്താൻ ഒരുങ്ങുകയാണ്, 33 വർഷങ്ങൾക്ക് ശേഷം വീണ്ടും ഒരു ചിത്രത്തിൽ അഭിനയിക്കാൻ ഒരുങ്ങുകയാണ് ഫാസിൽ.

പൃഥ്വിരാജ് ആദ്യമായി സംവിധാനം ചെയ്യുന്ന ‘ലൂസിഫർ’ എന്ന ചിത്രത്തിലാണ് ഫാസിൽ വേഷമിടുന്നത്. മോഹൻലാലിന്റെ തലതൊട്ടപ്പനായ പുരോഹിത വേഷമാണ് ഫാസിൽ കൈകാര്യം ചെയ്യുന്നത്. ഫാസിൽ എന്ന സംവിധായകനെ പ്രതീക്ഷിച്ച സിനിമ പ്രേമികൾക്ക് ഫാസിൽ എന്ന നടനെയാണ് പൃഥ്വിരാജ് വീണ്ടും ബിഗ് സ്ക്രീനിലേക്ക് എത്തിക്കുന്നത്. 1985ലാണ് അവസാനമായി ഒരു ചിത്രത്തിൽ ഫാസിൽ അഭിനയിക്കുന്നത്, മോഹൻലാൽ ചിത്രം ‘നോക്കെത്താദൂരത്ത് കണ്ണുംനട്ട്’ എന്ന ചിത്രത്തിലാണ് ഫാസിൽ ശ്രദ്ധയമായ കഥാപാത്രത്തെ അവതരിപ്പിച്ചത്. മോഹൻലാലിന്റെ സുഹൃത്ത് അലക്സ് എന്ന കഥാപാത്രമായാണ് വേഷമിട്ടിരുന്നത്. വർഷങ്ങൾ പിന്നിടുമ്പോൾ വീണ്ടുമൊരു മോഹൻലാൽ ചിത്രത്തിൽ തന്നെയാണ് ഫാസിൽ പ്രത്യക്ഷപ്പെടുന്നത്. പൃഥ്വിരാജ് എന്ന നടനെ ആദ്യമായി ഒരു നായക വേഷത്തിൽ സിനിമയെടുക്കുവാൻ തീരുമാനിച്ച സംവിധായകൻ കൂടിയായിരുന്നു ഫാസിൽ. ഏകദേശം 16 വർഷങ്ങൾക്ക് മുമ്പ് തീരുമാനിച്ചിരുന്ന പൃഥ്വിരാജ് ചിത്രം അവസാന നിമിഷമാണ് ഉപേക്ഷിക്കേണ്ടി വന്നത്. പൃഥ്വിരാജ് ആദ്യമായി സംവിധാനം ചെയ്യുന്ന ലൂസിഫറിന്റെ തിരക്കഥ ഒരുക്കുന്നത് മുരളി ഗോപിയാണ്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രം നിർമ്മിക്കുന്നത്.