വേറിട്ട പ്രണയകഥയുമായി അടിയന്തരാവസ്ഥ കാലത്തെ അനുരാഗം നാളെ മുതൽ; തീയേറ്റർ ലിസ്റ്റ് ഇതാ

മലയാളത്തിലെ പ്രശസ്ത നടനും സംവിധായകനുമായ ആലപ്പി അഷ്‌റഫിന്‍റെ ഏറ്റവും പുതിയ സിനിമ ‘അടിയന്തരാവസ്ഥ കാലത്തെ അനുരാഗം’ നാളെ മുതൽ പ്രേക്ഷകരുടെ മുന്നിലെത്തും. മനോഹരമായ ഒരു പ്രണയകഥ പറയുന്ന ഈ ചിത്രത്തിന്റെ തീയേറ്റർ ലിസ്റ്റ് ഇപ്പോൾ പുറത്തു വന്നിരിക്കുകയാണ്. ഇതിന്റെ ടീസർ, ട്രയ്ലർ, ഗാനങ്ങളെന്നിവ മികച്ച പ്രേക്ഷക ശ്രദ്ധയാണ് നേടിയെടുത്തത്. 1980 കളിലും 90 കളിലും മികച്ച ചിത്രങ്ങൾ സമ്മാനിച്ച ആലപ്പി അഷറഫ് വലിയ ഒരിടവേളക്ക് ശേഷം ഒരുക്കിയ ഈ ചിത്രത്തിൽ പുതുമുഖങ്ങളാണ് പ്രധാന വേഷങ്ങൾ ചെയ്യുന്നത്. അടിയന്തരാവസ്ഥക്കാലവുമായി ബന്ധപ്പെട്ട യഥാർഥ സംഭവങ്ങളെ കോർത്തിണക്കിയാണ് ഈ ചിത്രം ഒരുക്കിയിരിക്കുന്നതെന്നാണ് സൂചന. മോഹൻലാൽ നായകനായ നിന്നിഷ്ടം എന്നിഷ്ടം എന്ന സൂപ്പർ ഹിറ്റ് സമ്മാനിച്ച ആലപ്പി അഷറഫ് മറ്റൊരു ഹിറ്റ് കൂടി സമ്മാനിക്കാനുള്ള ഒരുക്കത്തിലാണ്.

മാര്‍ഷല്‍ ആര്‍ടിസ്റ്റ് കൂടിയായ പുതുമുഖമായ നഹാലാണ്‌ അടിയന്തരാവസ്ഥ കാലത്തെ അനുരാഗത്തിലെ നായകനായി എത്തുന്നത്. ഗോപികാ ഗിരീഷ് നായികാ വേഷം ചെയ്തിരിക്കുന്ന ഈ ചിത്രത്തിൽ ഹാഷിം ഷാ, കൃഷ്ണപ്രഭ, കലാഭവൻ റഹ്മാൻ, ഉഷ, ആലപ്പി അഷറഫ്, ഫെലിസിന, പ്രിയൻ, ശാന്തകുമാരി, അനന്തു കൊല്ലം, ജെ.ജെ. കുറ്റിക്കാട്, അമ്പുകാരൻ, മുന്ന, നിമിഷ, റിയ കാപ്പിൽ, എ.കബീർ എന്നിവരും നിർണ്ണായക കഥാപാത്രങ്ങൾ അവതരിപ്പിച്ചിരിക്കുന്നു. ഒലിവ് പ്രൊഡക്ഷൻസിൻ്റെ ബാനറിൽ കുര്യച്ചൻ വാളക്കുഴി നിർമ്മിച്ചിരിക്കുന്ന അടിയന്തരാവസ്ഥ കാലത്തെ അനുരാഗം രചിച്ചിരിക്കുന്നത് ടൈറ്റസ് ആറ്റിങ്ങലാണ്. അഫ്സൽ യൂസഫ്, കെ. ജെ. ആൻ്റണി, ടി. എസ്. ജയരാജ് എന്നിവർ സംഗീത സംവിധാനം നിർവഹിച്ച ഈ ചിത്രത്തിന് കാമറ ചലിപ്പിച്ചത് ബി.ടി.മണിയും എഡിറ്റിങ് ചെയ്തിരിക്കുന്നത് എൽ ഭൂമിനാഥനുമാണ്