അതാണ് ലാല്‍ മാജിക്; റാമിനെ കുറിച്ച് തൃഷ പറയുന്നത് ശ്രദ്ധ നേടുന്നു

മോഹന്‍ലാല്‍-ജീത്തു ജോസഫ് കൂട്ടുകെട്ടില്‍ ഒരുങ്ങുന്ന ചിത്രമാണ് റാം. ചിത്രത്തില്‍ ഒരു പ്രധാന കഥാപാത്രത്തെ തെന്നിന്ത്യന്‍ താരം ത്രിഷയാണ് അവതരിപ്പിക്കുന്നത്. സിനിമയില്‍ ഒപ്പം അഭിനയിക്കുന്ന മോഹന്‍ലാലിനെ കുറിച്ച് താരം ബിഹൈന്‍ഡ് വുഡ്സിന് നല്‍കിയ അഭിമുഖമാണ് സമൂഹ മാധ്യമങ്ങളില്‍ വൈറലാകുന്നത്.

മോഹന്‍ലാല്‍ ഫാന്‍ ഗേളാണ് താനെന്നും സെറ്റില്‍ അദ്ദേഹം എപ്പോഴും വളരെ കൂളായി തമാശയൊക്കെ പറഞ്ഞാണ് ഇരിക്കാറെന്ന് താരം അഭിമുഖത്തില്‍ പറ‍ഞ്ഞു. റാമിന്‍റെ ചിത്രീകരണം പുരോഗമിക്കുകയാണ്. അണിയറ പ്രവര്‍ത്തകര്‍ ചിത്രത്തിന്‍റെ രണ്ടാം ഭാഗം പ്ലാന്‍ ചെയ്യുന്നുണ്ടെന്നും ത്രിഷ വെളിപ്പെടുത്തി.

മോഹന്‍ലാല്‍ സാറിന്‍റെ വലിയ ഒരു ഫാന്‍ ആണ് ഞാന്‍. സാര്‍ വളരെ ഫണ്‍ ആണ്, നല്ലൊരു ജെന്‍റില്‍ മാനാണ് അദ്ദേഹം. സെറ്റില്‍ തമാശ പറഞ്ഞ് ഇരിക്കുമ്പോഴായിരിക്കും പെട്ടന്ന് നീണ്ട ഒരു ഷോട്ട് ചെയ്യാന്‍ അദ്ദേഹത്തെ വിളിക്കുക. എന്നാല്‍ അത്രയും നേരം നമ്മള്‍ കണ്ട മോഹന്‍ലാല്‍ ആയിരിക്കില്ല ആ സമയം. എത്ര പെട്ടന്നാണ് അദ്ദേഹം കഥാപാത്രമാകുന്നത്. അതാണ് മോഹന്‍ലാല്‍ മാജിക്. അഭിനയിക്കുമ്പോള്‍ പൂര്‍ണമായും അദ്ദേഹത്തിന്‍റെ ഫോക്കസ് അതിലുണ്ടാകും.

നല്ല തമാശക്കാരനാണ് ലാല്‍ സാര്‍. വര്‍ക്ക് ചെയ്യുന്ന സമയത്ത് മുഖത്ത് ഒരു ചെറിയ ഇറിറ്റേഷന്‍ പോലും ഞാന്‍ ഇതുവരെ കണ്ടിട്ടില്ല. എപ്പോഴും നല്ല മൂഡിലായിരുക്കും സാര്‍. ജീത്തു ജോസഫ്- മോഹന്‍ലാല്‍ കോമ്പിനേഷന്‍ എല്ലാവരും അറിയാവുന്നതാണ്. അവര്‍ക്കൊപ്പം വര്‍ക്ക് ചെയ്യാന്‍ കഴിഞ്ഞത് സന്തോഷമാണെന്നും ത്രിഷ പറഞ്ഞു.

റാമിന്‍റെ രണ്ടാം ഭാഗം അടുത്ത വര്‍ഷം ആരംഭിക്കും. ഒരു ഫോറിന്‍ ഷെഡ്യൂള്‍ കൂടെ കഴിഞ്ഞാല്‍ റാം സിനിമയുടെ ഷൂട്ടിങ് പൂര്‍ത്തിയാകും. കൊവിഡ് കാരണമാണ് എല്ലാം വൈകിയതെന്നും താരം പറഞ്ഞു.