ആരും കണ്ടാല്‍ കൊതിച്ചു പോകുന്ന ആ അമ്മയും മകനും, ഓര്‍മ്മകള്‍ പങ്കുവച്ച് നദിയ മൊയ്തു

തെന്നിന്ത്യൻ സിനിമയിലെ ഏറ്റവും പ്രശസ്തയായ നടിമാരിലൊരാളാണ് നദിയ മൊയ്തു. എൺപതുകളിലും തൊണ്ണൂറുകളിലും ഒട്ടേറെ നായികാ വേഷങ്ങളിലൂടെ പ്രേക്ഷകരുടെ മനസ്സ് കവർന്ന ഈ നടി പിന്നീട് ഒരിടവേളയെടുക്കുകയും അതിനു ശേഷം ശ്കതമായി തന്നെ തിരിച്ചു വരികയും ചെയ്തു. മോഹൻ രാജ സംവിധാനം ചെയ്ത തമിഴ് ചിത്രമായ എം കുമരന്‍, സണ്‍ ഓഫ് മഹാലക്ഷ്മിയിലൂടെയാണ് നദിയ തിരിച്ചു വരവ് കാഴ്ച വെച്ചത്. 2004 ഇൽ റിലീസ് ചെയ്ത ഈ ചിത്രത്തിൽ ജയം രവി, നദിയാമൊയ്തു, അസിന്‍, പ്രകാശ് രാജ്, വിവേക്, സുബ്ബരാജു, ഐശ്വര്യ തുടങ്ങിയവരാണ് പ്രധാന വേഷങ്ങൾ ചെയ്തത്. സൂപ്പർ ഹിറ്റായി മാറിയ ഈ ചിത്രത്തിൽ അമ്മയും മകനും തമ്മിലുള്ള ബന്ധം വ്യത്യസ്തരീതിയില്‍ അവതരിപ്പിക്കുകയാണ് ചെയ്തത്. ജയം രവിയും നദിയ മൊയ്തുവുമാണ് മകനും അമ്മയുമായി ഈ ചിത്രത്തിലെത്തിയത്. ഇപ്പോൾ തന്റെ ഇൻസ്റ്റാഗ്രാം പോസ്റ്റിലൂടെ ഈ ചിത്രത്തെ കുറിച്ചുള്ള മധുരമായ ഓർമകളാണ് നദിയ മൊയ്തു പങ്കു വെക്കുന്നത്.

ഈ സിനിമ ഇന്നുമോര്‍ക്കുന്നു എന്ന് പറഞ്ഞ നദിയ മൊയ്തു കുറിക്കുന്നത് ഈ ടീം തനിക്കെന്നും തന്റെ കുടുംബം പോലെയാണ് എന്നാണ്. ജയം രവിക്കും സംവിധായകന്‍ മോഹന്‍ രാജയ്ക്കുമൊപ്പം. എം കുമരന്‍, സണ്‍ ഓഫ് മഹാലക്ഷ്മി സെറ്റില്ലെ ഒരു ചിത്രവും ഈ കുറിപ്പിനൊപ്പം നദിയ മൊയ്തു പങ്കു വെച്ചിട്ടുണ്ട്. ഒരുപാട് നാളത്തെ വലിയൊരു ബ്രേക്കിനു ശേഷം സിനിമയിലെ തന്റെ രണ്ടാം ഇന്നിങ്സിനു തുടക്കമിട്ട ചിത്രം എന്ന വിശേഷണത്തോടു കൂടിയാണ് ഈ നടി ഷൂട്ടിംഗ് സെറ്റിലെ ചിത്രം പങ്കു വെച്ചിരിക്കുന്നത്. ആ ചിത്രത്തിന് ശേഷം മലയാളത്തിലും തമിഴിലുമൊക്കെ ഒട്ടേറെ വലിയ ചിത്രങ്ങളുടെ ഭാഗമായി നദിയ മൊയ്‌തുവെത്തി.