ദൃശ്യങ്ങൾ പുറത്തു !! സംഘട്ടനരംഗ ചിത്രീകരിക്കുന്നതിനിടെ ടോവിനോ തോമസിന് പൊള്ളലേറ്റു

മലയാള സിനിമയിൽ ഏറ്റവും തിരക്കുള്ള യുവനടന്മാരിൽ ഒരാളാണ് ടോവിനോ തോമസ്. ടോവിനോ നായകനായി എത്തുന്ന പുതിയ ചിത്രമാണ് എടക്കാട് ബറ്റാലിയൻ 06. ഒമർ ലുലുവിന്റെ അസ്സോസിയേറ്റ് ഡയറക്ടറായിരുന്ന സ്വപ്‌നേഷ് കെ. നായരാണ് ചിത്രം സംവിധാനം ചെയ്യുന്നത്. കോഴിക്കോട് ചിത്രികരണം പുരോഗമിച്ചുകൊണ്ടിരിക്കുന്ന ഈ ചിത്രത്തിന്റെ സംഘട്ടനരംഗത്തിനു ഇടയിലാണ് അപകടം നടന്നത്. നാല് വശത്തുനിന്നും തീ ഉപയോഗിച്ച് ചിത്രീകരിക്കുന്നൊരു രംഗമായിരുന്നു. അപകടം നിറഞ്ഞ രംഗമായതിനാൽ ഡ്യൂപ്പിനെ ഉപയോഗിക്കാമെന്ന് സംവിധായകൻ പറഞ്ഞെങ്കിലും അത് വേണ്ടെന്ന് ടൊവിനോ തീരുമാനിക്കുകയായിരുന്നു. സവിധായകൻ കട്ട് പറഞ്ഞെങ്കിലും രംഗം പൂർത്തിയാകാൻ കഴിയാഞ്ഞതിനാൽ ടൊവിനോ വീണ്ടും അഭിനയിക്കുകയായിരുന്നു. സംഘട്ടനരംഗം മുഴുവൻ ചെയ്തു തീർത്തതിനു ശേഷമാണ് ടൊവിനോ പിൻവാങ്ങിയത്. പൊള്ളലേറ്റ ടൊവിനോയ്ക്ക് ഉടൻ വൈദ്യസഹായം എത്തിച്ചു. ആശങ്കപ്പെടേണ്ടതായി ഒന്നുമില്ലെന്നും നിസ്സാരമായപരുക്കുകളാണ് താരത്തിന്റേതെന്നും അണിയറപ്രവർത്തകർ അറിയിച്ചു.‌‌‌

തീവണ്ടിക്ക് ശേഷം ടൊവിനോ തോമസും സംയുക്താ മേനോനും ജോടികളായി എത്തുന്ന ഈ ചിത്രത്തിന് തിരക്കഥ രചിച്ചിരിക്കുന്നതു നടനും സംവിധായകനുമായ പി.ബാല ചന്ദ്രനാണ് മലയാള സിനിമയ്ക്ക് വേണ്ടി ഒരുപിടി നല്ല തിരക്കഥകൾ സമ്മാനിച്ച വ്യക്തിയാണ് പി. ബാലചന്ദ്രൻ. ഉള്ളടക്കം, പവിത്രം, അഗ്നിദേവൻ, പുനരധിവാസം, തച്ചോളി വർഗീസ് ചേകവർ തുടങ്ങിയ ചിത്രങ്ങൾ ഏറെ ശ്രദ്ധേയമായിരുന്നു. അവസാനമായി തിരക്കഥ ഒരുക്കിയത് ദുൽഖർ- രാജീവ് രവി ചിത്രം കമ്മട്ടിപാടം എന്ന സൂപ്പർഹിറ്റ് ചിത്രത്തിന് വേണ്ടിയായിരുന്നു. റൂബി ഫിലിംസ് ആൻഡ്‌ കാർണിവൽ മോഷൻ പിക്‌ചേഴ്‌സിന്റെ ബാനറിൽ ശ്രീകാന്ത് ഭാസി, തോമസ് ജോസഫ് പട്ടത്താനം, ജയന്ത് മാമ്മൻ, എന്നിവർ ചേർന്നാണ് ചിത്രം നിർമിക്കുന്നത്. കൈലാസ് മേനോൻ സംഗീതവും സിനു സിദ്ധാർത്ഥ് ക്യാമറയും നിർവഹിക്കുന്നു