നടൻ ശ്രീജിത്ത് രവി അറസ്റ്റിൽ

പ്രശസ്ത സിനിമാ താരവും പ്രശസ്ത നടൻ ടി ജി രവിയുടെ മകനുമായ ശ്രീജിത്ത് രവി അറസ്റ്റിൽ എന്ന വാർത്തയാണ് ഇന്ന് രാവിലെ പുറത്ത് വന്നിരിക്കുന്നത്. കുട്ടികൾക്ക് മുമ്പിൽ നഗ്നത പ്രദർശനം നടത്തിയെന്ന കേസിലാണ് അദ്ദേഹത്തെ അറസ്റ്റ് ചെയ്തിരിക്കുന്നത്. തൃശൂർ വെസ്റ്റ് പൊലീസാണ് ഇന്ന് രാവിലെ ശ്രീജിത്ത് രവിയെ അറസ്റ്റ് ചെയ്തത്. പോക്സോ വകുപ്പുകൾ ചുമത്തിയാണ് ശ്രീജിത്ത് രവിക്കെതിരെ പോലീസ് കേസ് രജിസ്റ്റർ ചെയ്തിരിക്കുന്നത്. രണ്ടു ദിവസം മുൻപാണ് ശ്രീജിത്ത് രവിക്കെതിരെ പരാതി വന്നതും കേസ് രജിസ്റ്റർ ചെയ്യുന്നതും. തുടർന്ന് അന്വേഷണം ആരംഭിച്ച പോലീസ്, സിസിടിവികൾ കേന്ദ്രീകരിച്ച് നടത്തിയ അന്വേഷണത്തിൽ ശ്രീജിത്ത് രവിയുടെ വാഹനം തിരിച്ചറിയുകയും, പ്രതി ശ്രീജിത്ത് രവി തന്നെയാണെന്ന് ബോധ്യപ്പെട്ടതോടെ അറസ്റ്റിലേക്ക് നീങ്ങുകയുമായിരുന്നു. തൃശ്ശൂർ എസ് എൻ പാർക്കിന് സമീപത്ത് വെച്ച് 11ഉം അഞ്ചും വയസുള്ള രണ്ട് കുട്ടികൾക്ക് മുന്നിൽ വെച്ച് നഗ്നതാ പ്രദർശനം നടത്തി എന്നാണ് കേസ്.

രണ്ടു ദിവസം മുൻപാണ് ഈ സംഭവം നടന്നത്. കുട്ടികൾക്ക് മുന്നിൽ വെച്ച് നഗ്നതാ പ്രദർശനം നടത്തിയതിന് ശേഷം ശ്രീജിത് രവി അവിടെ നിന്ന് പോവുകയായിരുന്നു. കുട്ടികൾ മാതാപിതാക്കളെ വിവരം അറിയിക്കുകയും, ശേഷം അവർ പോലീസിൽ വിവരം അറിയിക്കുകയുമായിരുന്നു. ആദ്യം പ്രതികളെ തിരിച്ചറിയാൻ കുട്ടികൾക്ക് സാധിച്ചില്ലെങ്കിലും, പിന്നീട് പോലീസ് നടത്തിയ വിശദമായ പരിശോധനയിൽ അത് ശ്രീജിത്ത് രവിയാണെന്നു മനസ്സിലായി. പ്രതി സഞ്ചരിച്ച കാറിനെ കുറിച്ച് ലഭിച്ച സൂചനകളാണ് കേസിൽ നിർണ്ണായകമായി മാറിയത്. ഇന്ന് രാവിലെ അറസ്റ്റ് ചെയ്യപ്പെട്ട ശ്രീജിത്ത് രവി, കുറ്റം സമ്മതിച്ചു എന്നാണ് സൂചന. തന്റെ ഈ സ്വഭാവം ഒരു രോഗമാണെന്നും, താൻ മരുന്ന് കഴിക്കാത്തത് കൊണ്ടുണ്ടായ പ്രശ്നമാണെന്നുമാണ് ശ്രീജിത്ത് രവി പോലീസിനെ അറിയിച്ചിരിക്കുന്നതെന്നുമാണ് വാർത്തകൾ പറയുന്നത്. ഏതായാലും ശ്രീജിത്ത് രവിയെ വൈകാതെ കോടതിയിൽ ഹാജരാക്കും.