എം ടി വാസുദേവൻ നായരുടെ തിരക്കഥയിൽ മോഹൻലാൽ- പ്രിയദർശൻ ചിത്രം; ഷൂട്ടിംഗ് ആരംഭിച്ചു

മലയാളത്തിന്റെ വിഖ്യാത രചയിതാവ് എം ടി വാസുദേവൻ നായരുടെ തിരക്കഥയിൽ ഒരുങ്ങുന്ന പുതിയ ചിത്രത്തിന്റെ ഷൂട്ടിംഗ് ആരംഭിച്ചു. മോഹൻലാൽ നായകനായി എത്തുന്ന ഈ ചിത്രം സംവിധാനം ചെയ്യുന്നത് പ്രിയദർശനാണ്. സന്തോഷ് ശിവൻ ക്യാമറ ചലിപ്പിക്കുന്ന ഈ ചിത്രത്തിന് കലാസംവിധാനം നിർവഹിക്കുന്നത് സാബു സിറിലാണ്. ഓളവും തീരവും എന്നാണ് ഈ ചിത്രത്തിന്റെ പേര്. അമ്പതു വർഷം മുൻപ് ഈ കഥ പ്രശസ്‍ത സംവിധായകൻ പി എൻ മേനോൻ സിനിമയാക്കിയിരുന്നു. മലയാളത്തിലെ ആദ്യത്തെ റിയലിസ്റ്റിക് മേക്കിംഗ് മൂവി എന്നാണ് ഓളവും തീരവും അറിയപ്പെടുന്നത്. മദ്രാസിലെ ഇൻഡോർ ഷൂട്ടിംഗ് ഫ്‌ളോറുകളില്‍ കുടുങ്ങിക്കിടന്നിരുന്ന മലയാള സിനിമയെ പുറം വാതില്‍ ചിത്രീകരണത്തിലൂടെ മുന്നോട്ടു കൊണ്ട് വന്ന ചിത്രം കൂടിയാണ് ഓളവും തീരവും.

ആ സിനിമയ്ക്കും അതിന്റെ അണിയറപ്രവര്‍ത്തകര്‍ക്കുമുള്ള ആദരമെന്ന നിലയിൽ ഇപ്പോൾ ആ ചിത്രം പുനരവതരിപ്പിക്കുകയാണ് പ്രിയദർശൻ. മധു, ഉഷ നന്ദിനി, ജോസ് പ്രകാശ്, നിലമ്പൂർ ബാലൻ എന്നിവരാണ് അന്ന് ഈ ചിത്രത്തിൽ പ്രധാന വേഷങ്ങൾ ചെയ്തത്. അതിന്റെ ഈ പുനരവതരണത്തിൽ മോഹൻലാൽ, ദുർഗാ കൃഷ്ണ, ഹരീഷ് പേരാടി, മാമുക്കോയ എന്നിവരാണ് പ്രധാന വേഷങ്ങൾ ചെയ്യുക. എം ടി വാസുദേവൻ നായരുടെ പത്തു ചെറുകഥകൾ ചേർത്ത് നെറ്റ്ഫ്ലിക്സ് ഒരുക്കുന്ന ആന്തോളജിയുടെ ഭാഗമായാണ് ഈ ചിത്രം വരുന്നത്. ശ്യാമ പ്രസാദ്, ജയരാജ്, സന്തോഷ് ശിവൻ, പ്രിയദർശൻ, മഹേഷ് നാരായണൻ, ലിജോ ജോസ് പെല്ലിശ്ശേരി, അശ്വതി നായർ തുടങ്ങി ഒമ്പതോളം സംവിധായകരാണ് ഈ ചിത്രങ്ങൾ സംവിധാനം ചെയ്യുന്നത്. അതിൽ തന്നെ പ്രിയദർശൻ രണ്ടു ചിത്രങ്ങളാണ് ഒരുക്കുന്നത്. മോഹൻലാൽ നായകനായ ഓളവും തീരവും കൂടാതെ, ബിജു മേനോൻ നായകനായ ശിലാലിഖിതം എന്ന കഥയാണ് പ്രിയദർശൻ ഒരുക്കിയത്.