എനിക്കാശ്വസിക്കാൻ ഇതിൽപ്പരം വേറൊന്നും വേണ്ട; മോഹൻലാലിന് നന്ദി പറഞ്ഞു മണിക്കുട്ടൻ

കോവിഡ് 19 ഭീതിയിലൂടെ നമ്മുടെ നാട് കടന്നു പോകുമ്പോൾ എല്ലാ മേഖലകളിലും അതിന്റെ ദൂഷ്യ വശങ്ങൾ വളരെയധികം ദൃശ്യമാണ്. രാജ്യമെങ്ങും ലോക്ക് ഡൗണായതോടെ നിശ്ചലമായ സിനിമാ ഇൻഡസ്ട്രിയിൽ ജോലി ചെയ്യുന്നവരും പ്രതിസന്ധിയിലാണ്. മലയാള സിനിമയിൽ ഈ സമയത്തു ഒട്ടേറെ പേർക്ക് സഹായവുമായി എത്തുന്നത് മലയാളത്തിന്റെ മഹാനടൻ മോഹൻലാലാണ്. കേരളാ സർക്കാറുമൊന്നിച്ചു ഒട്ടേറെ പ്രവർത്തനങ്ങളിലേർപ്പെട്ട അദ്ദേഹം ആരോഗ്യ പ്രവർത്തകരുമായി സംവദിക്കുകയും അതുപോലെ ദുരിതാശ്വാസ പ്രവർത്തനങ്ങൾക്കായി മുഖ്യമന്ത്രിയുടെ ഫണ്ടിലേക്ക് അൻപതു ലക്ഷം രൂപ നൽകുകയും ചെയ്‌തു. ഇത് കൂടാതെ മലയാള സിനിമയിലെ ദിവസ വേതനക്കാരായ തൊഴിലാളികൾക്ക് വേണ്ടി പത്തു ലക്ഷം രൂപ നൽകിയ അദ്ദേഹം താര സംഘടനയായ അമ്മയിലെ അംഗങ്ങൾക്കും ആശ്വാസവുമായി മുന്നിലുണ്ട്. ഇപ്പോഴിതാ പ്രശസ്ത സിനിമാ താരം മണിക്കുട്ടൻ കഴിഞ്ഞ ദിവസം മോഹൻലാലിനെ കുറിച്ചിട്ട ഫേസ്ബുക്ക് പോസ്റ്റാണ് ശ്രദ്ധ നേടുന്നത്.

മണിക്കുട്ടന്റെ വാക്കുകൾ ഇങ്ങനെ, നന്ദി ലാലേട്ടാ ആ കരുതലിനും സ്നേഹത്തിനും. ലോക്ക് ഡൌൺ കാലഘട്ടത്തിൽ ശാരീരികമായും മാനസികമായും സാമ്പത്തികമായും എല്ലാവരേയും പോലെ ഞാനും ഉത്കണ്ഠയിലാണ്. സിനിമകൾ ചെയ്യുന്നത് കുറവാണെങ്കിലും സ്റ്റേജ് ഷോ, സിസിഎൽ ക്രിക്കറ്റ് മുതലായ പലതും ആണ് നമ്മുടെ ദൈനംദിനചിലവുകൾക്ക് സഹായിക്കുന്നത്. ഈ കാലഘട്ടത്തിൽ സ്റ്റേജ് ഷോയും മത്സരങ്ങളും ഒക്കെ അനിശ്ചിതമായി നീളുന്ന അവസ്ഥയാണ്. അന്നന്നുള്ള വരുമാനത്തിൽ ജീവിക്കുന്നവരുടെ, വരുമാനം മുട്ടിനിൽക്കുന്ന സാഹചര്യം എനിക്കൂഹിക്കാൻ കഴിയും. ഒരു struggling artist (struggling star അല്ല) എന്ന നിലയിൽ ഞാൻ സിനിമയിൽ എന്റെ സുഹൃത്തുക്കളായിരുന്ന പലരും ഈ സമയങ്ങളിൽ എന്നെ കുറിച്ച് അന്വേഷിക്കുകയോ ഞാൻ മെസ്സേജ് അയക്കുമ്പോൾ തിരിച്ചയക്കുകയോ ചെയ്തിട്ടില്ല, ഒരു പക്ഷെ അവരിൽ പലരും ഇതേഅവസ്ഥയിലൂടെ കടന്നു പോകുന്നവരായിരിക്കാം. ഈ വിഷമ ഘട്ടത്തിൽ ആ പ്രാർത്ഥന കണ്ടിട്ടാണോ എന്നറിയില്ല ഞാൻ ഏറ്റവും ആരാധിക്കുന്ന നമ്മുടെ അഭിമാനമായ ലാലേട്ടൻ എന്നെ വിളിക്കുകയും എന്റെയും മാതാപിതാക്കളെയും സഹോദരങ്ങളെയും പറ്റി അന്വേഷിക്കുകയും ചെയ്തു. കഴിഞ്ഞ പതിനഞ്ചു വർഷത്തെ സിനിമാജീവിതത്തിനിടയിൽ എന്നെ ഇത് വരേ അദ്ദേഹം നേരിട്ട് ഫോണിൽ വിളിച്ചിട്ടില്ല. ഉയിർത്തെഴുന്നേൽപ്പിന്റെ ഓർമ്മ കൂടിയായ ഈസ്റ്റർ ദിനമായിരുന്ന ഇന്ന് വന്ന ആ കാളിലേ ശബ്ദത്തിലെ സ്നേഹം ആ കരുതൽ പുതിയ ഊർജം പകർന്നു നൽകുന്ന ഒന്നാണ്. എനിക്കാശ്വസിക്കാൻ ഇതിൽപരം വേറൊന്നും വേണ്ട ഒരു കലാകാരനെന്ന നിലയിൽ. നമ്മളതിജീവിക്കും.