ആന അലറലോടലറൽ നാളെ മുതൽ; നൂറിന് മുകളിൽ സ്‌ക്രീനുകളിൽ വമ്പൻ റിലീസ്..!

പ്രേക്ഷകർ ഏറെ പ്രതീക്ഷകളോടെ കാത്തിരിക്കുന്ന വിനീത് ശ്രീനിവാസൻ ചിത്രം ആന അലറലോടലറൽ നാളെ മുതൽ തീയേറ്ററുകളിൽ എത്തുകയാണ്. നൂറിന് മുകളിൽ തീയേറ്ററുകളിൽ വമ്പൻ റിലീസ് ആയാണ് ഈ ചിത്രം എത്തുന്നത്. നവാഗതനായ ദിലീപ് മേനോൻ സംവിധാനം ചെയ്ത ഈ ചിത്രം രചിച്ചിരിക്കുന്നത് ശരത് ബാലൻ ആണ്. വിനീത് ശ്രീനിവാസൻ നായകനായി എത്തിയ ഒരു ചിത്രത്തിന് ലഭിക്കുന്ന ഏറ്റവും വലിയ റിലീസ് ആണ് ഈ ചിത്രം നേടിയിരിക്കുന്നത്. പോയട്രി ഫിലിമ്സിന്റെ ബാനറിൽ സിബി കെ തോട്ടുപുറം, നാവിസ് സേവ്യർ എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രം ആക്ഷേപ ഹാസ്യത്തിന്റെ മേമ്പൊടി ചാലിച്ചാണ് കഥ പറയുന്നത്. ഒരു ആനയും ഈ ചിത്രത്തിൽ നിർണ്ണായക കഥാപാത്രത്തെ അവതരിപ്പിക്കുന്നുണ്ട് .

അനു സിതാര ആണ് ഈ ചിത്രത്തിലെ നായികാ കഥാപാത്രത്തെ അവതരിപ്പിക്കുന്നത്. ഇവരെ കൂടാതെ സുരാജ് വെഞ്ഞാറമ്മൂട്, ഹാരിഷ് കണാരൻ, മാമുക്കോയ, വിജയരാഘവന്‍, വിശാഖ് നായര്‍ , തെസ്നി ഖാൻ, ഇന്നസെന്റ് , ധർമജൻ, ബിജു കുട്ടൻ എന്നിവരും ഈ ചിത്രത്തിൽ പ്രധാന വേഷങ്ങൾ ചെയ്യുന്നു. ഷാൻ റഹ്മാൻ സംഗീത സംവിധാനം നിർവഹിച്ച ഈ ചിത്രത്തിലെ ഗാനങ്ങൾ ഇപ്പോഴേ ഹിറ്റാണ്. ചിത്രത്തിന്റെ ട്രൈലെർ , പോസ്റ്റെർസ് തുടങ്ങിയവയും മികച്ച ജനശ്രദ്ധ നേടി എടുത്തത് ചിത്രത്തിന് മേലുള്ള പ്രതീക്ഷകൾ വർധിപ്പിച്ചിട്ടുണ്ട്. വിനീത് ശ്രീനിവാസന്റെ ഈ വർഷത്തെ മൂന്നാമത്തെ റിലീസ് ആണ് ആന അലറലോടലറൽ. എബി, ഒരു സിനിമാക്കാരൻ എന്നിവയായിരുന്നു മറ്റു രണ്ടു റിലീസുകൾ. ഒരുപാട് നാളുകൾക്കു ശേഷം ആണ് ഒരു ആനക്കഥ മലയാളത്തിൽ എത്തുന്നത് എന്ന പ്രത്യേകതയും ഈ ചിത്രത്തിന് ഉണ്ട്.