ക്വീനിനു അഭിനന്ദങ്ങളുമായി ആട് സംവിധായകൻ മിഥുൻ മാനുവൽ തോമസ് ..!

ഇന്നലെ റിലീസ് ചെയ്ത മലയാള ചിത്രങ്ങളിൽ ഒന്നാണ് നവാഗതനായ ഡിജോ ജോസ് ആന്റണി ഒരുക്കിയ ക്വീൻ എന്ന ചിത്രം. ഒരു കൂട്ടം നവാഗതർ പ്രധാന വേഷങ്ങളിൽ എത്തിയ ഈ ക്യാമ്പസ് ചിത്രം ആദ്യ ഷോ മുതൽ തന്നെ ഗംഭീര അഭിപ്രായം നേടി മുന്നേറുന്ന കാഴ്ചയാണ് കാണാൻ കഴിയുന്നത്. പ്രേക്ഷകരും നിരൂപകരും സിനിമാ പ്രവർത്തകരുമെല്ലാം ഈ ചിത്രത്തിനെ പ്രശംസ കൊണ്ട് മൂടുന്ന കാഴ്ചയാണ് നമ്മുക്ക് കാണാൻ കഴിയുന്നത്. ഇപ്പോഴിതാ ആട് 2 എന്ന ബ്ലോക്ബസ്റ്റർ ഹിറ്റ് നമ്മുക്ക് കഴിഞ്ഞ മാസം സമ്മാനിച്ച പ്രശസ്ത സംവിധായകൻ മിഥുൻ മാനുവൽ തോമസ് ക്വീനിനെ അഭിനന്ദിച്ചു മുന്നോട്ടു വന്നിരിക്കുന്നു. തന്റെ ഫേസ്ബുക് പേജിലൂടെയാണ് മിഥുൻ മാനുവൽ തോമസ് ഈ ചിത്രത്തെ അഭിനന്ദിച്ചു കൊണ്ട് പോസ്റ്റ് ഇട്ടതു.

താൻ ക്വീൻ കണ്ടു എന്നും ഒരുപാട് ഇഷ്ടമായി എന്നും മിഥുൻ മാനുവൽ തോമസ് പറയുന്നു. ഒരുപാട് അഭിനന്ദിക്കപ്പെടേണ്ടതും രസകരവുമായ ഒരു ശ്രമം ആണ് ക്വീൻ എന്ന ചിത്രം എന്ന് മിഥുൻ പറയുന്നു. ഒരു കൂട്ടം പുതുമുഖങ്ങളുടെ ഈ ശ്രമത്തെ പ്രേക്ഷകർ കയ്യടികളോടെ സ്വീകരിക്കുന്നത് കാണുന്നത് വളരെ സന്തോഷമുള്ള കാര്യം ആണെന്നും മിഥുൻ മാനുവൽ തോമസ് പറയുന്നു. ചിത്രത്തിൽ പ്രവർത്തിച്ച ഓരോരുത്തർക്കും അഭിനന്ദനങ്ങൾ പറഞ്ഞു കൊണ്ടാണ് മിഥുൻ നിർത്തുന്നത്. അറേബിയൻ ഡ്രീംസ് എന്റെർറ്റൈന്മെന്റിന്റെ ബാനറിൽ ഷിബു കെ മൊയ്‌ദീൻ , റിൻഷാദ് വെള്ളോടത്തിൽ എന്നിവർ ചേർന്ന് നിർമ്മിച്ച ഈ ചിത്രം രചിച്ചിരിക്കുന്നത് നവാഗതരായ ഷാരിസ് മുഹമ്മദ്, ജിബിൻ ജോസ് ആന്റണി എന്നിവർ ചേർന്നാണ്. പുതുമുഖങ്ങളോടൊപ്പം സലിം കുമാറും ഗംഭീര പ്രകടനം ആണ് ഈ ചിത്രത്തിൽ കാഴ്ച വെച്ചത്.