ഇതുവരെ കണ്ടിട്ടില്ലാത്ത കൊലപാതക രീതികളാകും CBI 5ൽ; ബാസ്കറ്റ് കില്ലിംഗ് അന്വേഷിക്കാൻ സേതുരാമയ്യർ മടങ്ങിയെത്തുന്നു..

മലയാള സിനിമാ പ്രേമികളെ ഏറെ ആവേശം കൊള്ളിച്ച ഒരു കഥാപാത്രം ആണ് മമ്മൂട്ടി അവതരിപ്പിച്ച സേതുരാമയ്യർ. 1988 ഇൽ എസ്‌ എൻ സ്വാമി- കെ മധു കൂട്ടുക്കെട്ടിൽ നിന്നും പുറത്തു വന്ന ഒരു സി ബി ഐ ഡയറി കുറിപ്പ് എന്ന ചിത്രത്തിലൂടെ ആണ് പ്രേക്ഷകർ ഈ സി ബി ഐ ഉദ്യോഗസ്ഥനായ കഥാപാത്രത്തെ ആദ്യമായി കണ്ടത്. അതിൽ സേതുരാമയ്യരുടെ ഡമ്മി ഇട്ടുള്ള അന്വേഷണവും കണ്ടെത്തലുകളുമെല്ലാം വലിയ ജനപ്രീതിയാണ് നേടിയെടുത്തത്‌. അതിനു ശേഷം 1989 ഇൽ ജാഗ്രത എന്ന പേരിൽ രണ്ടാം ഭാഗവും, 2004 ഇൽ സേതുരാമയ്യർ സി ബി ഐ എന്ന പേരിൽ മൂന്നാം ഭാഗവും ഉണ്ടായ ഈ ചിത്രത്തിന് 2005 ഇൽ നേരറിയാൻ സി ബി ഐ എന്ന നാലാം ഭാഗവും വന്നു. ഇതിലൂടെ എല്ലാം ഈ കഥാപാത്രത്തെ പ്രേക്ഷകർ തങ്ങളുടെ മനസ്സിൽ പ്രതിഷ്ഠിച്ചു.

ഇപ്പോഴിതാ നീണ്ട പതിനാലു വർഷത്തെ ഇടവേളക്കു ശേഷം എസ്‌ എൻ സ്വാമി- കെ മധു ടീം ഒരിക്കൽ കൂടി സേതുരാമയ്യരുമായി എത്താൻ ഒരുങ്ങുകയാണ്. അടുത്ത വർഷം ചിത്രീകരണം ആരംഭിക്കുന്ന ഈ ചിത്രം ബാസ്കറ്റ് കില്ലിംഗ് എന്ന രീതിയിൽ നടക്കുന്ന കൊലപാതക പരമ്പര അന്വേഷിക്കാൻ എത്തുന്ന സേതുരാമയ്യരുടെ കഥയാണ് പറയാൻ പോകുന്നത്. ബാസ്കറ്റ് കില്ലിംഗ് എന്നത് ഒരു സസ്പെൻസ് ആണെന്നും അധികമാരും കേട്ടിട്ടില്ല ഈ രീതിയെ കുറിച്ച് എന്നതാണ് ഈ ചിത്രത്തിലെ നിഗൂഢത എന്നും എസ്‌ എൻ സ്വാമി പറയുന്നു. ഇതുവരെ കണ്ടിട്ടില്ലാത്ത കൊലപാതക രീതികൾ ആണ് ഈ ചിത്രത്തിൽ അവതരിപ്പിക്കുക എന്നും കാലത്തിനും മാറിയ പ്രേക്ഷക അഭിരുചികൾക്കുമൊപ്പം നിൽക്കുന്ന സിനിമയാവും ഇതെന്ന ആത്മ വിശ്വാസവും എസ്‌ എൻ സ്വാമി പ്രകടിപ്പിച്ചു.

അടുത്ത വർഷം ജനുവരിയിലോ ഫെബ്രുവരിയിലോ ഈ ചിത്രം ആരംഭിക്കും എന്ന സൂചനയാണ് ലഭിക്കുന്നത്. മമ്മൂട്ടി ഈ ചിത്രം ഒഫീഷ്യൽ ആയി പ്രഖ്യാപിക്കുന്നതു കാണാൻ കാത്തിരിക്കുകയാണ് ആരാധകരും സിനിമാ പ്രേമികളും. കുറേ നാളായി സംവിധാനത്തിൽ നിന്ന് വിട്ടു നിൽക്കുന്ന കെ മധുവിന്റെ ഒരു തിരിച്ചു വരവ് കൂടിയാവും ഈ ചിത്രം.