ദളപതിയുടെ വാരിസും തലയുടെ തുനിവും; ആദ്യ ദിന ആഗോള കളക്ഷൻ റിപ്പോർട്ട് ഇതാ

ദളപതി വിജയ് നായകനായി എത്തിയ വാരിസ് ഇന്നലെയാണ് ആഗോള റിലീസായി എത്തിയത്‌. വംശി സംവിധാനം ചെയ്ത ഈ ചിത്രം നിർമ്മിച്ചിരിക്കുന്നത് ദിൽ രാജു ആണ്. ഒരു പക്കാ ഫാമിലി എന്റർടൈനേർ ആയി ഒരുക്കിയ ഈ ചിത്രത്തിന് സമ്മിശ്ര പ്രതികരണമാണ് ലഭിച്ചത്. എങ്കിലും മികച്ച ഓപ്പണിങ് നേടിയെടുക്കാൻ ഈ ചിത്രത്തിന് സാധിച്ചു. ഇപ്പോൾ വരുന്ന റിപ്പോർട്ടുകൾ പ്രകാരം ഇൻഡ്യയിൽ നിന്ന് ഈ ചിത്രം നേടിയത് 30 കോടിയോളം ആണ്. വിദേശ കളക്ഷൻ കൂടി ചേർക്കുമ്പോൾ 40 കോടിയോളം വാരിസ് ആദ്യ ദിനം നേടിയെന്നാണ് കണക്ക് കൂട്ടുന്നത്. കേരളത്തിൽ നിന്ന് നാലര കോടിയോളം ആദ്യ ദിനം നേടിയ വാരിസ്, തമിഴ്നാട് നിന്ന് 20 കോടിയോളമാണ് നേടിയെടുത്തത്.

കർണാടകയിൽ നിന്നും നാലര കോടിയോളം നേടിയ വാരിസ് റെസ്റ്റ് ഓഫ് ഇന്ത്യ മാർക്കറ്റിൽ നിന്ന് 1 കോടി നേടി. അജിത് നായകനായ തുനിവും ഇന്നലെയാണ് ആഗോള റിലീസായി വന്നത്. ആഗോള കലക്ഷൻ ആയി 39 കോടിയോളം ആണ് ഈ ചിത്രം നേടിയതെന്നാണ് സൂചന. തമിഴ്നാട് നിന്ന് 21 കോടിക്കു മുകളിൽ നേടിയ തുനിവ് കർണാടകയിൽ നിന്ന് മൂന്ന് കോടി 75 ലക്ഷവും കേരളത്തിൽ നിന്ന് 1.40 കോടിയും നേടി. റെസ്റ്റ് ഓഫ് ഇന്ത്യ മാർക്കറ്റിൽ നിന്ന് 2 കോടി 60 ലക്ഷത്തോളം ഗ്രോസ് നേടിയ തുനിവ് വിദേശ മാർക്കറ്റിൽ നിന്ന് 10 കോടിക്കു മുകളിൽ നേടി എന്നാണ് റിപ്പോർട്ടുകൾ പറയുന്നത്. ഈ രണ്ട് ചിത്രങ്ങളും കൂടി ആദ്യ ദിനം തമിഴ്നാട് നിന്നു മാത്രം നേടിയത് 41 കോടി രൂപയാണ്.