റെക്കോർഡ് കളക്ഷൻ; ഇത് ഇന്ത്യൻ സിനിമയിൽ പുതിയ ചരിത്രം; കെ ജി എഫ് 2 കളക്ഷൻ റിപ്പോർട്ട് ഇതാ..!

റോക്കിങ് സ്റ്റാർ യാഷ് നായകനായ ബ്രഹ്മാണ്ഡ ചിത്രം കെ ജി എഫ് 2 ബോക്സ് ഓഫീസിൽ തീ പടർത്തി മുന്നേറുകയാണ്. പ്രശാന്ത് നീൽ ഒരുക്കിയ ഈ ചിത്രത്തിന് ഗംഭീര പ്രേക്ഷക പ്രതികരണം ആണ് ലഭിച്ചു കൊണ്ടിരിക്കുന്നത്. ഇപ്പോഴിതാ ഈ ചിത്രത്തിന്റെ ആദ്യ ദിന കളക്ഷൻ റിപ്പോർട്ട് പുറത്തു വന്നിരിക്കുകയാണ്. ഇന്ത്യയിൽ നിന്നും മാത്രം കെ ജി എഫ് 2 ആദ്യ ദിനം നേടിയത് 134 കോടിക്ക് മുകളിൽ ആണ്. വിദേശത്തു നിന്നും മുപ്പതു കോടിയോളം നേടിയ ഈ ചിത്രം ആദ്യ ദിനം നേടിയ ആഗോള കളക്ഷൻ 160 കോടിക്ക് മുകളിൽ ആണ്. ആദ്യ ദിനം ഇരുന്നൂറു കോടിക്ക് മുകളിൽ നേടിയ രാജമൗലി ചിത്രം ആർ ആർ ആർ ആണ് ഈ ലിസ്റ്റിൽ മുന്നിൽ. 223 കോടിയാണ് ആർ ആർ ആർ ആദ്യ ദിനം നേടിയ ആഗോള കളക്ഷൻ. 218 കോടി ആദ്യ ദിനം നേടിയ ബാഹുബലി രണ്ടാം ഭാഗവും ഈ ലിസ്റ്റിൽ കെ ജി എഫ് 2 നു മുന്നിൽ ഉണ്ട്.

കേരളത്തിൽ നിന്ന് ഏഴു കോടിക്ക് മുകളിൽ ആണ് ഈ ചിത്രം ആദ്യ ദിവസം നേടിയത്. കർണാടകയിൽ ഈ ചിത്രം ആദ്യ ദിനം പുത്തൻ റെക്കോർഡുകൾ ആണ് ഉണ്ടാക്കിയത്. നായകനായ യാഷിനൊപ്പം വില്ലൻ വേഷം ചെയ്ത സഞ്ജയ് ദത്, രവീണ ടണ്ഠൻ എന്നിവരും വലിയ അഭിനന്ദനം ഏറ്റു വാങ്ങുന്നുണ്ട്. അഞ്ചു ഭാഷകളിൽ റിലീസ് ചെയ്ത ഈ ചിത്രം കേരളത്തിൽ വിതരണം ചെയ്തിരിക്കുന്നത് നടൻ പൃഥ്വിരാജ് സുകുമാരന്റെ പ്രൊഡക്ഷൻ ബാനർ ആണ്. ശ്രീനിഥി ഷെട്ടി, പ്രകാശ് രാജ്, അച്യുത് കുമാർ, റാവു രമേശ്, ഈശ്വരി റാവു, മാളവിക അവിനാശ്, അയ്യപ്പ പി ശർമ്മ തുടങ്ങി ഒരു വലിയ താരനിര അണിനിരന്നിരിക്കുന്ന ഈ ചിത്രത്തിന് സംഗീതം ഒരുക്കിയത് രവി ബസ്‌റൂർ, എഡിറ്റ് ചെയ്തത് ഉജ്ജ്വൽ കുൽക്കർണി, കാമറ ചലിപ്പിച്ചത് ഭുവൻ ഗൗഡ എന്നിവരാണ്. നൂറു കോടി രൂപ മുതൽ മുടക്കി ഹോംബാലെ ഫിലിമ്സിന്റെ ബാനറിൽ വിജയ് കിരാഗേന്ദുർ ആണ് കെ ജി എഫ് 2 നിർമ്മിച്ചിരിക്കുന്നത്.