വീണ്ടും കളക്ഷൻ റെക്കോർഡുകൾ തകർത്തു സൂപ്പർ സ്റ്റാർ; അണ്ണാതെ കളക്ഷൻ റിപ്പോർട്ട് ഇതാ..!

സൂപ്പർ സ്റ്റാർ രജനികാന്ത് നായകനായ അണ്ണാതെ എന്ന ബിഗ് ബഡ്ജറ്റ് മാസ്സ് ആക്ഷൻ ഫാമിലി ഡ്രാമ, ദീപാവലി റിലീസ് ആയി ഈ നവംബർ പത്തിനാണ് പുറത്തു വന്നത്. സമ്മിശ്ര പ്രതികരണമാണ് ചിത്രം നേടിയത് എങ്കിലും ആദ്യ ദിനങ്ങളിൽ വമ്പൻ കളക്ഷൻ ആണ് ഈ ചിത്രം നേടുന്നത്. കേരളത്തിൽ ആദ്യ ദിനം മികച്ച കളക്ഷൻ നേടിയെങ്കിലും തുടർന്ന് അത് നിലനിർത്താൻ ചിത്രത്തിന് സാധിച്ചിട്ടില്ല. പക്ഷെ തമിഴ് നാട്ടിൽ ഇപ്പോഴും മികച്ച പ്രകടനമാണ് ചിത്രം കാഴ്ച വെക്കുന്നത്. മാത്രമല്ല ആഗോള തലത്തിലും മികച്ച കളക്ഷൻ നേടാൻ ഈ ചിത്രത്തിന് സാധിക്കുന്നുണ്ട്. ഇപ്പോൾ വരുന്ന പുതിയ റിപ്പോർട്ടുകൾ പ്രകാരം രണ്ടു ദിവസം കൊണ്ടാണ് ഈ ചിത്രം നൂറു കോടിയിലധികം രൂപ തീയേറ്റർ കളക്ഷൻ നേടിയെടുത്തത്. എഴുപതു കോടിക്ക് മുകളിൽ ആദ്യ ദിനം ഗ്രോസ് നേടിയ ഈ ചിത്രം രണ്ടാം ദിനം നേടിയത് നാല്പത്തിരണ്ടു കോടിക്ക് മുകളിൽ ആണെന്നാണ് സൂചന.

അജിത് നായകനായ സൂപ്പർ ഹിറ്റ് ചിത്രങ്ങളായ വീരം, വേതാളം, വിശ്വാസം എന്നിവ ഒരുക്കിയ സംവിധായകൻ ശിവ ഒരുക്കിയ ഈ ചിത്രം സണ് പിക്ചേഴ്‌സ് ആണ് നിർമ്മിച്ചിരിക്കുന്നത്. ഡി ഇമ്മൻ ഒരുക്കിയ ത്രസിപ്പിക്കുന്ന പശ്‌ചാത്തല സംഗീതവും ഗാനങ്ങളും അണ്ണാത്തെയുടെ ഹൈലൈറ്റ് ആണ്. രജനികാന്തിനൊപ്പം ലേഡി സൂപ്പർ സ്റ്റാർ നയൻതാര, കീർത്തി സുരേഷ്, മീന, ഖുശ്‌ബു സുന്ദർ, പ്രകാശ് രാജ്, സൂരി, ജഗപതി ബാബു, സതീഷ് എന്നിവരും ഈ ചിത്രത്തിൽ അഭിനയിച്ചിരിക്കുന്നു. കോമഡിയും ആക്ഷനും തീപ്പൊരി ഡയലോഗുകളും പ്രണയവും പ്രതികാരവും വൈകാരിക നിമിഷങ്ങളും എല്ലാം കൃത്യമായി കോർത്തിണക്കിയ ഒരു എന്റെർറ്റൈനെർ ആയാണ് ഈ ചിത്രമൊരുക്കിയിരിക്കുന്നതു.