കാത്തിരുന്ന വിക്രം മാജിക്; ധ്രുവ നച്ചത്തിരം റീലീസ് ഡേറ്റ് എത്തി; സ്പെഷ്യൽ വീഡിയോ കാണാം.

തമിഴകത്തിന്റെ ചിയാൻ വിക്രം നായകനായി എത്തുന്ന ഏറ്റവും പുതിയ ചിത്രമായ ധ്രുവ നച്ചത്തിരത്തിന്റെ റീലീസ് ഡേറ്റ് പ്രഖ്യാപിച്ചു. ഏറെ വർഷങ്ങളായി പ്രൊഡക്ഷനിൽ ഇരുന്ന ഈ ചിത്രത്തിന്റെ റീലീസ് പല കാരണങ്ങൾ കൊണ്ട് നീണ്ടു പോവുകയായിരുന്നു. ഗൗതം വാസുദേവ് മേനോൻ സംവിധാനം ചെയ്ത ഈ ചിത്രം ഒന്നിലധികം ഭാഗങ്ങളിൽ ആണ് കഥ പറയുക എന്നും അദ്ദേഹം വെളിപ്പെടുത്തിയിരുന്നു. ഏതായാലും ആരാധകരുടെ കാത്തിരിപ്പിനൊടുവിൽ ഒഫീഷ്യലായി തന്നെ ഈ ചിത്രത്തിന്റെ റിലീസ് ഡേറ്റ് അണിയറ പ്രവർത്തകർ പുറത്ത് വിട്ടിരിക്കുകയാണ്. ഈ വർഷം നവംബർ 24 നാണ് ചിത്രം ആഗോള റിലീസായി എത്തുന്നത്. സെന്സറിങ് പൂർത്തിയായ ധ്രുവ നച്ചത്തിരത്തിന് യു എ സർട്ടിഫിക്കറ്റ് ആണ് ലഭിച്ചിരിക്കുന്നത്.

ഇതിന്റെ ടീസറുകൾ, ഇതിലെ ഗാനങ്ങൾ എന്നിവ നേരത്തെ റിലീസ് ചെയ്യുകയും വലിയ പ്രേക്ഷക ശ്രദ്ധ നേടുകയും ചെയ്തിരുന്നു. ഐശ്വര്യ രാജേഷും റിതു വർമയും നായികാ വേഷങ്ങൾ ചെയ്യുന്ന ഈ ചിത്രത്തിൽ മലയാള നടൻ വിനായകനും അഭിനയിച്ചിട്ടുണ്ട്. സിമ്രാൻ, രാധിക ശരത് കുമാർ, പാർത്ഥിപൻ, ദിവ്യ ദർശിനി, വംശി കൃഷ്ണ എന്നിവരും താരനിരയിലുള്ള ഈ ചിത്രത്തിന് സംഗീതമൊരുക്കിയത് ഹാരിസ് ജയരാജ് ആണ്. ഒരു സ്പൈ ത്രില്ലർ ആയൊരുക്കിയ ഈ ചിത്രത്തിന് തിരക്കഥ രചിച്ചത് സംവിധായകൻ ഗൗതം മേനോൻ തന്നെയാണ്. മനോജ് പരമഹംസ ക്യാമറ ചലിപ്പിച്ച ഈ ചിത്രത്തിന്റെ ഹൈലൈറ്റ് ഇതിലെ സ്റ്റൈലിഷ് ആക്ഷൻ രംഗങ്ങളാണെന്നാണ് സൂചന. ഗൗതം വാസുദേവ് മേനോന്റെ നിർമ്മാണ കമ്പനി തന്നെയാണ് ധ്രുവ നച്ചത്തിരം നിർമ്മിച്ചിരിക്കുന്നത്. ഈ ചിത്രത്തിന്റെ ട്രയ്ലറും ഉടൻ റീലീസ് ചെയ്യും.