വൈറലായി വിജയ് യേശുദാസിന്റെ മാരി ഡാൻസ്; വീഡിയോ കാണാം..!

തെന്നിന്ത്യൻ സിനിമയിലെ പ്രശസ്തരായ ഗായകരിൽ ഒരാളാണ് ഡോക്ടർ കെ ജെ യേശുദാസിന്റെ മകനായ വിജയ് യേശുദാസ്. വളരെ ചുരുങ്ങിയ കാലംകൊണ്ട് തന്നെ ഒരു ഗായകനെന്ന നിലയിൽ തന്റേതായ ഒരിടം തെന്നിന്ത്യൻ സിനിമാ ലോകത്തു കണ്ടെത്തിയ ഈ ഗായകൻ ഒരു നടൻ എന്ന നിലയിലും ഇപ്പോൾ പ്രശസ്തനാണ്. ഒരുപിടി തമിഴ്- മലയാളം ചിത്രങ്ങളിൽ അഭിനയിക്കുന്ന വിജയ് യേശുദാസ് ഇപ്പോൾ തന്റെ പുതിയ തമിഴ് ചിത്രത്തിന് വേണ്ടിയുള്ള തയ്യാറെടുപ്പിലാണ്. അതിന്റെ ഭാഗമായി നൃത്തം പരിശീലിക്കുകയാണ് വിജയ് യേശുദാസ്. ഏതായാലും താൻ നൃത്തം ചെയ്യുന്ന പുതിയ വീഡിയോ വിജയ് യേശുദാസ് പങ്കു വെച്ചത് വലിയ രീതിയിൽ സോഷ്യൽ മീഡിയയുടെ ശ്രദ്ധ നേടിയെടുക്കുകയാണ്. വിജയ് യേശുദാസ് തമിഴിൽ അരങ്ങേറ്റം കുറിച്ച മാരി എന്ന തമിഴ് ചിത്രത്തിലെ ഒരു ഗാനത്തിനാണ് അദ്ദേഹം ഈ വീഡിയോയിൽ ചുവടു വെക്കുന്നത്.

https://www.instagram.com/p/CPlLMLvJNwX/

മാരിയിലെ നായകൻ ധനുഷ് നൃത്തം ചെയ്തു ഗംഭീരമാക്കിയ ആ ഗാനത്തിന് മികച്ച രീതിയിൽ തന്നെയാണ് വിജയ് യേശുദാസും ചുവടു വെക്കുന്നത്. വിജയറാണി ഒരുക്കിയ ഈ നൃത്ത ചുവടുകൾ തന്റെ ഇൻസ്റ്റഗ്രാം വഴിയാണ് വിജയ് യേശുദാസ് പങ്കു വെച്ചിരിക്കുന്നത്. പടൈവീരൻ എന്ന തന്റെ പുതിയ ചിത്രത്തിലെ മുനീശ്വരൻ എന്ന കഥാപാത്രത്തിന് വേണ്ടിയാണു വിജയ് യേശുദാസ് നൃത്തം പഠിക്കുന്നത്. ധന ആണ് ഈ ചിത്രം സംവിധാനം ചെയ്യുന്നത്. ഇത് കൂടാതെ സാൽമൺ എന്ന ഒരു ബഹുഭാഷാ ത്രീഡി ചിത്രത്തിലും വിജയ് യേശുദാസ് നായകനായി എത്തുന്നുണ്ട്. അവൻ എന്ന മലയാള ചിത്രത്തിലൂടെ പതിനൊന്നു വര്ഷം മുൻപാണ് വിജയ് യേശുദാസ് അഭിനയത്തിൽ അരങ്ങേറ്റം കുറിക്കുന്നത്.