കിടിലൻ സംഘട്ടനവുമായി വിജയ് സേതുപതിയുടെ മകൻ; വീഡിയോ വൈറലാവുന്നു..!

തമിഴകത്തിന്റെ മക്കൾ സെൽവൻ വിജയ് സേതുപതി ഇപ്പോൾ ഒട്ടേറെ ഇന്ത്യൻ ഭാഷകളിലെ നിറ സാന്നിധ്യമായി മാറിക്കഴിഞ്ഞു. തമിഴ്, മലയാളം, തെലുങ്ക്, കന്നഡ, ഹിന്ദി ഭാഷകളിലൊക്കെ അഭിനയിക്കുന്ന ഈ നടൻ എല്ലാത്തരം കഥാപാത്രങ്ങളും ചെയ്യാൻ ഒരുക്കമാണ് എന്നതാണ് അദ്ദേഹത്തെ വേറിട്ട് നിർത്തുന്നത്. ഇമേജിനെ ഭയക്കാതെ ചിത്രങ്ങൾ ചെയ്യുന്നതാണ് വിജയ് സേതുപതി എന്ന നടനേയും താരത്തെയും പ്രേക്ഷകർ ഇരുകയ്യും നീട്ടി സ്വീകരിക്കാനുള്ള കാരണം. ഇന്ത്യൻ സിനിമയുടെ പുതിയ തലമുറയിലെ ഏറ്റവും മികച്ച നടന്മാരിൽ ഒരാൾ എന്ന സ്ഥാനവും ഇപ്പോൾ വിജയ് സേതുപതിക്ക് സ്വന്തമാണ്. എന്നാൽ ഇപ്പോൾ സോഷ്യൽ മീഡിയയിൽ ശ്രദ്ധ നേടിയെടുക്കുന്നത് വിജയ് സേതുപതിയുടെ മകൻ സൂര്യ സേതുപതി ആണ്. ഇൻസ്റാഗ്രാമിലൂടെ പുറത്തു വന്ന, ഒരു സ്റ്റണ്ട് വീഡിയോയിലെ പ്രകടനമാണ് സൂര്യ സേതുപതിക്ക് വലിയ ശ്രദ്ധ നേടിക്കൊടുക്കുന്നത്. നടനും സംവിധായകനുമായ ഗോകുൽനാഥ് ഷൂട്ട് ചെയ്തു എഡിറ്റ് ചെയ്ത ഈ സംഘട്ടന വീഡിയോയിൽ സൂര്യ സേതുപതിയും ഗോകുൽനാഥും രോഹൻ സുരേഷുമാണ് അഭിനയിച്ചിരിക്കുന്നത്.

അസുരൻ എന്ന ചിത്രത്തിലെ പശ്ചാത്തല സംഗീതത്തിന്റെ അകമ്പടിയോടെ ആണ് ഈ രംഗം ചിത്രീകരിച്ചിരിക്കുന്നത്. നാനും റൗഡി താൻ, സിന്ധുബാദ് എന്നീ ചിത്രങ്ങളിൽ അഭിനയിക്കുകയും ചെയ്തിട്ടുള്ള സൂര്യ സേതുപതി അച്ഛനെ പോലെ തന്നെ അഭിനയ രംഗത്തേക്ക് ശ്കതമായി കടന്നു വരുമെന്നാണ് ഏവരും പ്രതീക്ഷിക്കുന്നത്. ഇപ്പോൾ കൈനിറയെ ചിത്രങ്ങളുമായി തിരക്കിലുള്ള വിജയ് സേതുപതിയുടെ ഇനി വരാനിരിക്കുന്ന ചിത്രങ്ങൾ തുഗ്ലക് ദർബാർ, മാമനിതൻ, വിക്രം, 19(1)(a) , ലാഭം, ഷാഹിദ് കപൂറിനൊപ്പം ഹിന്ദിയിൽ ചെയുന്ന വെബ് സീരിസ്, കാത്തു വക്കുള്ള രണ്ടു കാതൽ എന്നിവയാണ്. കടയ്‌സി വ്യവസായി, യാതും ഊര് യാവരും കേളിർ, മുഗിഴ്, വിടുതലൈ, മുംബൈക്കർ തുടങ്ങിയ ചിത്രങ്ങളും വിജയ് സേതുപതി അഭനയിച്ചു പുറത്തു വരാനൊരുങ്ങുന്നവയാണ്.