ഗ്രാമഭംഗിയും ചില നാട്ടുകാര്യങ്ങളുമായി ബേസിൽ; ‘പാൽതു ജാൻവറി’ലെ ‘അമ്പിളിരാവ്’ ഗാനം പുറത്ത്

മലയാളിയുടെ ഓണം കൊഴുപ്പിക്കാനുള്ള തയ്യാറെടുപ്പിലാണ് മലയാളത്തിന്റെ പ്രിയ സംവിധായകരായ ബേസില്‍ ജോസഫും, ദിലീഷ് പോത്തനും. ഇവർക്കൊപ്പം തിരക്കഥാകൃത്ത് ശ്യാം പുഷ്ക്കരനും മലയാളിയുടെ പ്രിയപ്പെട്ട ഫഫയും ഒരുമിച്ചാൽ പിന്നെ സംഭവം കുശാലായിരിക്കുമെന്നതിൽ സംശയമില്ല. എന്നാൽ ഈ കൂടിച്ചേരലിലെ പ്രത്യേകത ബേസിൽ ജോസഫ് നായകനാകുമ്പോൾ, ദിലീഷ് പോത്തനും ശ്യാം പുഷ്ക്കരനും ഫഹദ് ഫാസിലും നിർമാതാക്കളാകുന്നു എന്നതാണ്. കുമ്പളങ്ങി നെറ്റ്സ്, ജോജി എന്നീ ഹിറ്റ് ചിത്രങ്ങൾ ഒരുക്കിയ ഭാവന സ്റ്റുഡിയോസിന്റെ ബാനറിൽ തന്നെയാണ് പാൽതു ജാൻവറും നിർമിക്കുന്നത്.

ഇപ്പോഴിതാ ചിത്രത്തിൽ നിന്നും ‘അമ്പിളി രാവ്’ എന്ന മനോഹരമായ ഗാനമാണ് പുറത്തുവിട്ടിട്ടുള്ളത്. കുടിയൻമല എന്ന ഗ്രാമത്തിന്റെ പശ്ചാത്തലത്തിൽ ഒരുക്കിയ ഗാനം ആലപിച്ചിരിക്കുന്നത് അരുൺ അശോകാണ്. സുഹൈൽ കോയ വരികൾ എഴുതിയിരിക്കുന്ന ഗാനത്തിന്റെ ഈണം ചിട്ടപ്പെടുത്തിയിരിക്കുന്നത് ജസ്റ്റിൻ വർഗീസ് ആണ്.

നവാ​ഗതനായ സം​ഗീത് പി. രാജനാണ് പാൽതു ജാനവറിന്റെ സംവിധായകൻ. ബേസിൽ ജോസഫ് കേന്ദ്രകഥാപാത്രമാകുന്ന ചിത്രത്തിൽ ഇന്ദ്രൻസ്, ജോണി ആന്റണി, ദിലീഷ് പോത്തൻ, ഷമ്മി തിലകൻ, ആതിര ഹരികുമാർ, ശ്രുതി സുരേഷ്, ജയകുറുപ്പ്, തങ്കം മോഹൻ, സ്റ്റെഫി സണ്ണി, വിജയകുമാർ, ജോജി ജോൺ, കിരൺ പീതാംബരൻ, സിബി തോമസ് എന്നിവർ നിർണായക വേഷങ്ങളിലെത്തുന്നു.
വിനോയ് തോമസ്, അനീഷ് അഞ്ജലി എന്നിവരാണ് ചിത്രത്തിന്റെ രചന. കിരൺ ദാസ് എഡിറ്റിങ്ങും, രൺദീവെ ക്യാമറയും കൈകാര്യം ചെയ്യുന്നു. പ്രേക്ഷകർ ആകാംക്ഷയോടെ കാത്തിരിക്കുന്ന പാൽതു ജാൻവർ ഓണം റിലീസായി കേരളത്തിലെത്തുമ്പോൾ, പ്ലേ ഫിലിംസുമായി ചേർന്ന് സ്റ്റാർസ് ഹോളിഡേ ഫിലിംസ് ചിത്രം വിദേശ രാജ്യങ്ങളിൽ പ്രദർശനത്തിനെത്തിക്കും.