ഇതിൽ കഥയില്ല, കാരണം ഇത് ജീവിതം; ഞെട്ടിക്കാൻ ചിമ്പു, വിസ്മയിപ്പിച്ച് ഗൗതം മേനോൻ; വെന്ത് തനിന്തത് കാട് ട്രൈലെർ കാണാം

ഗൗതം വാസുദേവ് മേനോന്റെ സംവിധാനത്തില്‍ ചിമ്പു നായകനായി എത്തുന്ന ഏറ്റവും പുതിയ ചിത്രമാണ് വെന്ത് തനിന്തത് കാട്. വേല്‍സ് ഫിലിം ഇന്‍റര്‍നാഷണലിന്‍റെ ബാനറില്‍ ഡോ: ഇഷാരി കെ ഗണേഷ് നിര്‍മ്മിക്കുന്ന ഈ ചിത്രത്തിന്റെ ട്രൈലെർ ഇന്നലെ റിലീസ് ചെയ്തു. ഗംഭീര പ്രേക്ഷക പ്രതികരണമാണ് ഈ ട്രെയിലറിന് ലഭിച്ചു കൊണ്ടിരിക്കുന്നത്. ചിമ്പു എന്ന നടന്റെ കരിയർ ബെസ്റ്റ് പ്രകടനമാണ് പ്രേക്ഷകരെ കാത്തിരിക്കുന്നതെന്ന സൂചനയാണ് ഈ ട്രൈലെർ തരുന്നത്. ഒരു കഥാപാത്രത്തിന്റെ ജീവിത യാത്ര പറയുന്ന ഈ ചിത്രം രണ്ടു ഭാഗങ്ങളായാണ് പുറത്തു വരാൻ പോകുന്നതെന്നും ഈ ട്രൈലെർ കാണിച്ചു തരുന്നുണ്ട്. വളരെ റിയലിസ്റ്റിക് ആയും അതേ സമയം മാസ്സ് ആയുമാണ് ഇതിൽ കഥ പറഞ്ഞിരിക്കുന്നതെന്ന സൂചനയും ഈ ട്രൈലെർ നമുക്ക് തരുന്നുണ്ട്. മലയാളി താരം നീരജ് മാധവും ഒരു പ്രധാന കഥാപാത്രത്തെ അവതരിപ്പിക്കുന്ന ഈ ചിത്രം ഒരു റൂറല്‍ ഡ്രാമ-ത്രില്ലര്‍ ആയാണ് ഗൗതം വാസുദേവ് മേനോൻ ഒരുക്കിയിരിക്കുന്നത്.

ഈ വരുന്ന സെപ്റ്റംബര് 15ന് ആണ് വെന്ത് തനിന്തത് കാട് റിലീസ് ചെയ്യുക. ഉദയനിധി സ്റ്റാലിന്റെ റെഡ് ജിയാന്റ് മൂവീസ് ആണ് ഈ ചിത്രം വിതരണം ചെയ്യുന്നത്. എ ആർ റഹ്മാൻ സംഗീതമൊരുക്കിയിരിക്കുന്ന ഈ ചിത്രം രചിച്ചിരിക്കുന്നത് ജയമോഹനാണ്. സിദ്ധാർത്ഥ നൂനി ക്യാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് ആന്റണിയാണ്. ഇതിനോടകം മുപ്പതു ലക്ഷത്തിലധികം കാഴ്ചക്കാരെ ലഭിച്ച ഈ ട്രെയിലറിലെ എ ആർ റഹ്മാന്റെ പശ്ചാത്തല സംഗീതത്തിനും ഗംഭീര അഭിപ്രായമാണ് ലഭിക്കുന്നത്. ഗൗതം വാസുദേവ് മേനോനും, എ ആർ റഹ്മാനും തങ്ങളുടെ വിന്റേജ് ഫോമിലേക്ക് മടങ്ങിയെത്തിയെന്നാണ് സിനിമാ പ്രേമികൾ അഭിപ്രായപ്പെടുന്നത്.