സോഷ്യൽ മീഡിയയിൽ വീണ്ടും തരംഗമാകാൻ അങ്കിളിൻറെ പുതിയ ടീസർ എത്തി..

മെഗാസ്റ്റാർ മമ്മൂട്ടിയെ നായകനാക്കി ഗിരീഷ് ദാമോദർ സംവിധാനം ചെയ്ത ചിത്രം അങ്കിൾ വ്യത്യസ്ത പ്രമേയത്തിലും ആഖ്യാനത്തിലും ഇതിനോടകം തന്നെ ശ്രദ്ധ പിടിച്ചുപറ്റിയ ചിത്രമാണ്. കൃഷ്ണകുമാർ എന്ന കഥാപാത്രത്തെ മമ്മൂട്ടി അവതരിപ്പിക്കുമ്പോൾ. ജോയ് മാത്യു, മുത്തുമണി, കാർത്തിക മുരളീധരൻ എന്നിവർ മറ്റു കഥാപാത്രങ്ങളായി എത്തുന്നു. ഷട്ടർ എന്ന ചിത്രത്തിന് ശേഷം ജോയ് മാത്യു രചിച്ച തിരക്കഥ സാമൂഹിക പ്രതിബദ്ധതയുള്ള വിഷയത്തിൽ ഊന്നി നിൽക്കുന്ന ചിത്രം കൂടിയാണ്. അപ്രതീക്ഷിതമായാണ് എങ്കിലും കൃഷ്ണ കുമാറിനോടൊപ്പം യാത്ര ചെയ്യേണ്ടി ശ്രുതിയുടെയും, അവരുടെ യാത്രയെയും കുറിച്ചുള്ള വീട്ടുകാരുടെ ചിന്തകളുമാണ് ചിത്രത്തിന്റെ ഇതിവൃത്തം. താര പരിവേഷങ്ങൾ ഏതുമില്ലാതെ കൃഷ്ണകുമാർ എന്ന കഥാപാത്രത്തെ തന്റെ അഭിനയമികവുകൊണ്ട് മികച്ചതാക്കിയ മമ്മൂട്ടിക്ക് നിറഞ്ഞ കയ്യടികളാണ് തീയറ്ററുകളിൽ ലഭിക്കുന്നത്. ചിത്രം വിജയമായിക്കൊണ്ടിരിക്കെയാണ് ചിത്രത്തിൻറെ പുതിയ ടീസർ കൂടി പുറത്തു വരുന്നത്.

കുടുംബപ്രേക്ഷകരുടെ പിന്തുണയോട് കൂടി വൻ വിജയത്തിലേക്ക് കുതിക്കുന്ന ചിത്രത്തിന്റെ പുതിയ ടീസർ കൂടി വന്നതോടുകൂടി ചിത്രം കൂടുതൽ ആളുകളിലേക്ക് എത്തുമെന്നാണ് കരുതുന്നത്. ഇതിനോടകം തന്നെ സോഷ്യൽ മീഡിയയിൽ ടീസർ ചർച്ചയായിക്കഴിഞ്ഞു. ആദ്യ ടീസറുകളേയും ട്രെയിലറുകളും അപേക്ഷിച്ച് ഇത്തവണ കൂടുതൽ കഥയോടു ചേർന്നു നിൽക്കുന്ന ത്രില്ലടിപ്പിക്കുന്ന മുഹൂർത്തങ്ങളുമായാണ് ടീസർ ഒരുക്കിയിരിക്കുന്നത്. ചിത്രം പുറത്തിറങ്ങിയതിന് ശേഷം ടീസർ പുറത്തിറങ്ങുക എന്നത് മലയാളത്തിൽ ഇപ്പോൾ പുതിയൊരു തരം ശൈലിയായി മാറിയിരിക്കുകയാണ് അങ്കിളും ആ രീതിയിൽ തന്നെയാണ് എത്തുന്നത്. നിറഞ്ഞ സദസ്സിൽ പ്രദർശിപ്പിക്കുന്ന ചിത്രത്തിനെപ്പറ്റി മികച്ച അഭിപ്രായങ്ങളുമായി സിനിമാതാരങ്ങൾ കഴിഞ്ഞദിവസങ്ങളിൽ എത്തിയിരുന്നു. മറ്റ് റിലീസുകൾക്കിടയിലും ആധിപത്യമുറപ്പിച്ചു അങ്കിൾ മുന്നേറുകയാണ്.