മെഗാസ്റ്റാർ മമ്മൂട്ടി ആലപിച്ച അങ്കിളിലെ രസകരമായ ഗാനം സോഷ്യൽ മീഡിയയിൽ തരംഗമാകുന്നു…

മലയാളികളുടെ പ്രിയതാരം മമ്മൂട്ടി ആലപിച്ച അങ്കിളിനെ രസകരമായ ഗാനം പുറത്തിറങ്ങി. എന്താ ജോൺസാ കള്ളില്ലേ എന്ന് തുടങ്ങുന്ന ഗാനമാണ് മമ്മൂട്ടി ആലപിച്ചിരിക്കുന്നത്. മമ്മൂട്ടി ഗാനം ആലപിക്കുന്നതും സ്റ്റുഡിയോയിലെ വളരെ രസകരമായ രംഗങ്ങളുമാണ് വീഡിയോയിൽ ഉൾക്കൊള്ളിച്ചിരിക്കുന്നത്. ബിജിബാലാണ് ഗാനത്തിന് സംഗീത സംവിധാനം നിർവ്വഹിച്ചിരിക്കുന്നത്. ഇതിന് മുൻപ് ജവാൻ ഓഫ് വെള്ളിമല എന്ന ചിത്രത്തിനു വേണ്ടിയും മമ്മൂട്ടി ഗാനം ആലപിച്ചിരുന്നു. പക്ഷെ അന്ന് കുറച്ചു വരികൾ മാത്രമായിരുന്നു മമ്മൂട്ടി ആലപിച്ചത്. എന്തായാലും അപ്രതീക്ഷിതമായി കിട്ടിയ മമ്മൂട്ടിയുടെ ഗാനത്തിലൂടെ ആരാധകരും പ്രേക്ഷകരും വളരെയധികം സന്തോഷത്തിലാണ്. ട്രൈലറുകളിലൂടെയും പോസ്റ്ററുകളിലൂടെയും വളരെയധികം നിഗൂഢത നിറഞ്ഞ ചിത്രം ഗാനത്തിലൂടെ കൗതുകമുണർത്തുന്ന ഒന്നായി മാറിയിട്ടുണ്ട്. ചിത്രം നാളെ തീയറ്ററുകളിലെത്തും.

നവാഗതനായ ഗിരീഷ് ദാമോദറാണ് ചിത്രം സംവിധാനം ചെയ്തിരിക്കുന്നത്. മികച്ച പ്രേക്ഷക പ്രശംസ നേടിയ ചിത്രം ഷട്ടറിനു ശേഷം ജോയ് മാത്യു തിരക്കഥ എഴുതിയ ചിത്രമെന്ന രീതിയിൽ വലിയ പ്രതീക്ഷയോടെയാണ് അങ്കിൾ എത്തുന്നത്. രചയിതാവ് ജോയ് മാത്യുവും ചിത്രത്തിൽ ഒരു പ്രധാന കഥാപാത്രമായി എത്തുന്നു. മുതിർന്ന ഛായാഗ്രാഹകന്മാരിൽ ഒരാളായ അഴകപ്പനാണ് ചിത്രത്തിനായി ക്യാമറ ചലിപ്പിച്ചിരിക്കുന്നത്. ജോയ് മാത്യു, കെ. പി. എ. സി ലളിത, സുരേഷ് കൃഷ്ണ, കൈലാഷ്, മുത്തുമണി തുടങ്ങിയവർ അഭിനയിചിരിക്കുന്നു. സാമൂഹിക വിഷയങ്ങളിലൂടെ കടന്ന് പോകുന്ന ചിത്രം ഒരു ത്രില്ലിങ് അനുഭവമായിരിക്കും എന്നാണ് അറിയാൻ കഴിയുന്നത്. അബ്രാ ഫിലിംസും എസ്. ജെ ഫിലിംസും സംയുക്തമായി നിർമ്മിക്കുന്ന ചിത്രം, ന്യൂ സൂര്യ മൂവീസാണ് വിതരണത്തിനെത്തിക്കുന്നത്.